Gazetari Ilir Ikonomi është larguar nga Zëri i Amerikës pas plot 3 dekadash. Këtë të premte ai drejtoi dhe emisionin e fundit, nga ku bëri dhe një përshëndetje të fundit.
Duke treguar se pas kësaj mbrëmje ai do dalë në pension për të ndjekur pasione të tjera për jetën, Ilir Ikonomi përmendi si momentin më kulmor të karrierës 12 qershorin e vitit 1999 kur hyri në Kosovë bashkë me trupat e NATO-s dhe raportoi prej andej për Zërin e Amerikës me një telefon satelitor.
Pas tre dekadash tek Zëri i Amerikës, gazetari Ilir Ikonomi drejtoi të premten emisionin e fundit të një karriere, gjatë së cilës ka mbuluar ngjarje madhore në Shetet e Bashkuara, Shqipëri, Kosovë dhe kudo ku ka publik shqipfolës.
“Përpara se të ndahemi, do të desha t’ju njoftoj se kjo është dita ime e fundit në Zërin e Amerikës. Pas kësaj, unë dal në pension për të ndjekur pasione të tjera në jetën time.
Pas pothuajse tre dekadash, ndihem i privilegjuar që punova në këtë institucion kaq të respektuar që tradicionalisht njihet si zëri i së vërtetës. Por unë do të desha t’ju them ju të gjithëve, shikuesve tanë: ju faleminderit për mundësinë që më dhatë për të hyrë në shtëpitë tuaja, për të folur hapur me ju, për të ndarë me ju lajmet nga Amerika dhe nga bota.
Në këto momente kujtoj njërën nga ngjarjet kulmore të karrierës sime – 12 qershorin e vitit 1999 kur hyra në Kosovë bashkë me trupat e NATO-s dhe raportova prej andej për Zërin e Amerikës me një telefon satelitor.
Ngjarje si kjo dhe të tjera do të mbeten të pashlyera në kujtesën time.
Kur u krijua Zëri i Amerikës rreth 80 vjet më parë, prezantuesi i saj William Harlan Hale, tha disa fjalë monumentale që ne i përmendim vazhdimisht si kredon tonë. Ai tha: “Lajmet mund të jenë të mira për ne, ose të këqia. Ne do t’ju themi të vërtetën.”
Të raportosh të vërtetën nuk është diçka e lehtë sepse kërkon guxim, kërkon punë. Dhe unë besoj se gazetarëve të Zërit të Amerikës, që punojnë jashtë ndërhyrjes nga qeveria, mund t’u njihet plotësisht kjo meritë.
Prandaj them se për mua ka qenë një nder, nëse kam ndihmuar sado pak në këtë përpjekje.
Për Zërin e Amerikës, unë jam Ilir Ikonomi.
Natën e Mirë!”, tha Ilir Ikonomi.
