Tani është herët pasdite në Ukrainë dhe bombardimet e rënda vazhdojnë në disa qytete në ditën e 10-të të luftës, me raporte për luftime trup më trup në disa vende.
Ngjarjet kanë ecur me shpejtësi mëngjesin e sotëm, me një armëpushim të planifikuar në dy qytete që u rrëzua shpejt. Albeu.com ju sjell një përmbledhje të zhvillimeve të fundit
Armëpushimi
Rusia dhe Ukraina ranë dakord për një armëpushim të përkohshëm në qytetet e granatuara rëndë të Mariupol dhe Volnovakha për të lejuar civilët të shpëtojnë
Armëpushimi duhej të fillonte në orën 09:00 me orën lokale (07:00 GMT), me evakuimet e para dy orë më vonë.
Por menjëherë pas shpalljes së armëpushimit, nënkryetari i bashkisë së Mariupolit tha se trupat ruse ishin ende duke bombarduar qytetin dhe luftimet vazhduan në rrugën e rënë dakord të arratisjes.
Ukraina e shtyu evakuimin, ndërsa civilët në Mariupol u njoftuan për lajmin përmes altoparlantit.
Ministria ruse e mbrojtjes tha se civilët nuk kishin përdorur rrugët e evakumit, dhe akuzoi autoritetet ukrainase për pengimin e njerëzve që të largoheshin, tha media shtetërore ruse.
Negociatat mes të dyja palëve po vazhdojnë, tha nënkryetari i bashkisë.
Diku tjetër
Rusia ka “shumë të ngjarë” të ketë rrethuar katër qytete kryesore, Kharkiv, Chernihiv, Sumy dhe Mariupol, tha Ministria e Mbrojtjes e Mbretërisë së Bashkuar.
Kremlini mbrojti një ligj të ri që mund t’i burgoste njerëzit deri në 15 vjet për publikimin e “lajmeve të rreme” për Rusinë, duke thënë se vendi u përball me një “luftë informacioni”.
Ukraina tha se 66,000 burra janë kthyer në shtëpi për të luftuar.
Zara po mbyll të 500 dyqanet e saj në Rusi, ndërsa Samsung dhe PayPal po pezullojnë aktivitetet në vend.
Shtetasit britanikë, prania e të cilëve në Rusi nuk është thelbësore, janë këshilluar fuqimisht të marrin në konsideratë largimin, tha Ministria e Jashtme e Mbretërisë së Bashkuar./albeu.com
