Ministri i Transportit dhe Komunikimit në Bosnjë-Hercegovinë, Vojin Mitrovic, gjatë një vizite në Malin e Zi deklaroi se një hekurudhë do të lidhë Shqipërinë, Malin e Zi dhe Bosnjë-Hercekovinën.
“Shqipëria, Mali i zi dhe Bosnjë-Hercegovina duhet të lidhen shumë shpejt me një sistem hekurudhor”. Kështu raportohet të ketë thënë .
“Një prej temave të diskutimit në takim ishte edhe çështja e lidhjes së vendeve të Ballkanit Perëndimor, fillimisht përmes rrugëve, e më pas përmes hekurudhave”, citohet Mitrovic nga “Sarajevo Times”.
Ai theksoi se objektivi i autostradës adriatiko-joniane është që të lidhë Italinë me rrugë tokësore me Ballkanin, përmes Sllovenisë, Kroacisë, Bosnjë-Hercegovinës, Shqipërisë e deri në Greqi. I pyetur kur do të niste realizimi i këtij projekti, Mitrovic tha se negociatat kanë nisur, por po zgjasin shumë. “Një prej problemeve është përcaktimi se ku do të kalojë rruga, e cila do të ketë nevojë për marrëveshje ndërshtetërore”, tha Mitrovic.
Kujtojmë se në shtator, ministrja e Infrastrukturës dhe Energjisë, Belinda Balluku, tha në Samitin Hekurudhor të Beogradit se Shqipëria do të lidhej me Malin e Zi, përmes linjës hekurudhore, por për zbatimin e projekteve nevojiteshin kapacitete shtesë./albeu.com/
