Myslimanët në mbarë botën, filluan pelegrinazhin e Haxhit në Arabinë Saudite, me autoritetet që parashikojnë pjesëmarrjen e dy milionë personave. Pasi vizitojnë Qabenë, ndërtesën e shenjtë prej guri brenda Xhamisë së Madhe të Mekës, pelegrinët shkojnë në luginën Mina aty pranë, ku do të kalojnë natën në një qytet të madh çadrash.
Ditën e dytë ata i drejtohen malit Arafat, rreth 20 kilometra në lindje të Mekës, ku qëndrojnë deri në perëndim të diellit në atë që konsiderohet kulmi i pelegrinazhit të Haxhit.
Ndërsa temperaturat brenda dhe përreth Mekës, pritet të arrijnë 43 gradë Celsius, autoritetet u kanë kërkuar pelegrinëve të mbajnë me vete çadra për mbrojtje gjatë ritualeve.
Haxhi, një nga pesë shtyllat e Islamit, është një detyrë e detyrueshme që të gjithë myslimanët duhet ta kryejnë një herë në jetën e tyre, nëse janë fizikisht të aftë për të ndërmarrë udhëtimin për në vendlindjen e profetit Muhamed dhe kanë burime financiare.
Burrat veshin rroba të bardha dhe gratë veshin fustane të lirshme, ndërsa kryejnë të njëjtat rituale në një shfaqje të unitetit fetar, barazisë dhe kërkimit të rinovimit shpirtëror.
Haxhi zhvillohet nga dita e tetë deri në ditën e dymbëdhjetë të Dhul Hixhes, muaji i fundit i kalendarit hënor islam.
