Një ngjarje e rëndë u shënua mbrëmjen e djeshme (12 mars) në “Don Bosko” në ambientet e një lokali në pronësi të Fatjon Muratit.
Nga atentati mafioz mbeti e vrarë banakierja e lokalit, Mimoza Paja 58 vjeç, si dhe u plagosën pesë persona të tjerë mes tyre edhe një e mitur 10-vjeçare (mbesa e viktimës.)
Pavarësisht se nuk ka informacion zyrtar se kush ishte shënjestra e atentatit, dyshohet se është një hakmarrje mes grupeve rivale.
Në shënjestër dyshohet se ka qenë Fatjon Murati (pronari i lokalit), i cili ndodhej në “arrest shtëpie”.
Por, në momentin e atentatit ai nuk ka qenë në lokalin që ishte pronësi të tij, madje 37-vjeçari nuk ndodhej as në banesën e tij duke thyer kështu masën e sigurisë.
Po kush është Murati?
Në botën e sportit e njohin mirë djaloshin nga Kukësi. Ai ka qenë boksier profesionist. Madje ka garuar për titullin kampion bote në Federatën IBF Junior kundër Francesco Versaçit.
Asokohe ai jetonte në Gjermani dhe në atë përballje do të shkonte pa asnjë humbje. Murati ka nisur karrierën si boksier profesionist në vitin 2008 në Mynih të Gjermanisë.
Fillimet e veta i ka pasur në Shqipëri, ku kishte rënë në sy për talentin e tij në këtë sport. Pas Luan Krasniqit dhe Nuri Seferit, Murati ishte boksieri i tretë shqiptar që ndeshej për një titull aq të rëndësishëm.
Karrierën e tij në këtë sport nuk e vijoi për shumë vite. Ndërkohë në vendin tonë u përmend vitin e shkuar në atentantin mafioz të ndodhur në mbikalimin e Fushë Krujës ku mbetën të vrarë 3 persona, mes tyre kushëriri i parë i Ervis Martinajt.
Prokuroria dhe Gjykata nuk arritën të provonin fajin e ish boksierit, megjithatë ai u ndalua për armëmbajtje pa leje, ku vuante dhe masën e sigurisë arrest shtëpie./Albeu.com/
