Ministri i Shëndetësisë, Arben Vitia, ka thënë se shteti s’mund të japë asnjë detaj për procesin e sigurimit të vaksinave kundër koronavirusit, duke thënë se komisioni i themeluar për këtë çështje është nën betim.
Në një konferencë për media të premten në mbrëmje, duke mohuar raportimet se ai ka neglizhuar një kontratë për sjelljen e vaksinave të “Pfizerit” në Kosovë, Vitia ka deklaruar vetëm se “është i kënaqur me punën e komisionit dhe progresin e arritur deri tani”.
Ai ka ftuar Prokurorinë e shtetit që të mbrojë interesin publik dhe shëndetin e qytetarëve duke “hetuar ata që po dëmtojnë procesin”.
Bashkë me kryesuesin e këtij komisioni, Vitia ka thënë se Kosova është duke negociuar me shumë kompani prodhuese të vaksinave.
