Diplomatët e nivelit të lartë nga Rusia dhe SHBA do të takohen këtë javë për të diskutuar mbi operacionet e ambasadave të tyre përkatëse, ka thënë ministri i Jashtëm rus Sergej Lavrov.
Lavrov i bëri këto komente të mërkurën në një konferencë për shtyp në Doha të Katarit, duke specifikuar se takimi do të zhvillohet në Stamboll të Turqisë, më 27 shkurt dhe do të fokusohet në normalizimin e punës së ambasadave të të dy vendeve. Rezultati i bisedimeve të ardhshme do të përcaktojë se sa “shpejt dhe efektivisht mund të ecim përpara”, shtoi diplomati.
Sipas Lavrov, të dy palët pritet të trajtojnë “çështjet sistemike” që rrjedhin nga “veprimet e paligjshme të administratës së mëparshme amerikane për të krijuar pengesa artificiale” për operacionet e ambasadës ruse.
Rusia dhe SHBA-ja kanë një histori të gjatë tensionesh diplomatike, duke përfshirë dëbimet reciproke të stafit të ambasadës edhe para përshkallëzimit të konfliktit të Ukrainës në vitin 2022.
