Pas rreth tetë orësh angazhim intensiv, shërbimi zjarrfikës arriti të izolojë vatrën e zjarrit që u aktivizua mesditën e së dielës në zonën e Lugut të Lakrave, pjesë e Njësisë Administrative Qukës në Bashkinë Prrenjas.
Flakët u evidentuan rreth orës 12:00 dhe përfshinë fillimisht një sipërfaqe prej afro 0.5 hektarësh me ah, bar të thatë dhe trungje të thata. Terreni i vështirë dhe sasia e materialit të tharë shtuan rrezikun që zjarri të shtrihej në një zonë më të madhe.
Të lidhura
None found
Në operacion u përfshinë menjëherë gjashtë punonjës të shërbimit zjarrfikës të Prrenjasit, të cilët kishin në dispozicion mjetet dhe pajisjet e domosdoshme për ndërhyrjen. Aksioni u krye në bashkëpunim me Administratën e Zonave të Mbrojtura Elbasan, ndërsa uji u sigurua me anë të një kamioni.
Ekipet vijuan punën pa ndërprerje nga ora 12:00 deri në 20:00, duke vepruar në kushte të vështira për të penguar avancimin e flakëve dhe për të kontrolluar vatrat që mbeteshin aktive.
Shërbimi zjarrfikës i Prrenjasit bëri të ditur se, në orët e vona të mbrëmjes, zjarri ishte zgjeruar, por puna e forcave në terren mundësoi izolimin e plotë të vatrës, e cila aktualisht nuk përbën rrezik për përhapje të mëtejshme.
Edhe pse situata është vënë nën kontroll, shërbimet po vazhdojnë mbikëqyrjen e zonës për të parandaluar riaktivizimin e vatrave. Vëmendja mbetet e shtuar për shkak të barit dhe materialit të thatë pyjor, të cilat, në temperatura të larta, favorizojnë përhapjen e zjarreve.
