Policia e Tiranë ka vënë në pranga kushëririn e Ervis Martinajt, Emiljano Nina, i cili u aksidentua te Liqeni Artificial me një mjet luksoz dhe u arratis pas ngjarjes.
Ai u lokalizua në zonën e “5 Majit” në Tiranë gjatë orëve të mbrëmjes së djeshme, 12 tetor.
Tashmë i vënë në pranga, efektivëve u dëshmoi se ishte duke udhëtuar me 180 km/h dhe se ka humbur arsyen në një moment duke mos kontrolluar dot automjetin, pasi thotë se kishte pirë tullumbace me oksid azoti, lëndën e rrezikshme që autoritetet në Shqipëri po përpiqen të gjejnë hapësirat ligjore për ta ndaluar.
Policia në njoftimin zyrtar ditën e sotme, bëri me dije se Nina ishte shpallur në kërkim edhe për dhunë në familje, pasi Gjykata e Shkallës së Parë e Juridiksionit të Përgjithshëm Tiranë e ka dënuar me 8 muaj burgim, për këtë vepër penale.
Nina kishte dhunuar të dashurën, e cila e kishte denoncuar dje Gjykata e Tiranës e ka dënuar në mungesë.
Automjeti luksoz BMW, me të cilën u përplas te Liqeni, është në pronësi të 26-vjeçarit Eldi Allushi i cili ishte personi i parë që u shpall në kërkim nga policia, derisa nga dëshmia e tij u zbulua se nuk ishte fare në makinë dhe se shofer ishte kushëriri i Ervis Martinaj, mik i të riut nga Durrësi, të cilit ia kishte dhënë automjetin për të shoqëruar një vajzë.
Pas përplasjes, Emiljano Nina shkoi në banesën e tij, tregoi Eldi Allushi dhe fjeti gjumë, pa i treguar mbi aksidentin e frikshëm dhe që ishte larguar duke marrë me vete edhe targat e automjetit./Albeu.com
