I dënuar me 9 vite burg në Itali për trafikim narkotikësh, kapet në Durrës 41 vjeçari

Një 41-vjeçar të identifikuar si Adrian Kacmoli, i cili rezulton i dënuar në Itali me 9 vite e 3 muaj burgim është kapur nga blutë e Durrësit.

Arrestimi i tij është bërë me qëllim ekstradimin drejt Italisë, ku dhe do të vuaj dënimin e dhënë për aktivitetin kriminal në fushën e trafikut të lëndëve narkotike.

Njoftimi i plotë i policisë:

Durrës

Vijojnë operacionet e njëpasnjëshme nga Policia e Durrësit, për kapjen e personave në kërkim ndërkombëtar.

Vihet në pranga një shtetas i shpallur në kërkim ndërkombëtar, i dënuar me 9 vjet e 3 muaj burg, me qëllim ekstradimin drejt Italisë.

Operacioni i zhvilluar nga strukturat e DVP Durrës dhe Forca e Posaçme Operacionale, në bashkëpunim me Interpol Tirana.

Strukturat e Policisë Vendore Durrës, në vijim të punës për kapjen e personave të shpallur në kërkim ndërkombëtar, si rezultat i shkëmbimit të vazhdueshëm të informacioneve me ZKQ Interpol Tirana, në bazë dhe të informacioneve të siguruara në rrugë operative, kanë bërë të mundur lokalizimin dhe arrestimin provizor të shtetasit Adrian Kacmoli, 41 vjeç, banues në Durrës.

Ky shtetas ishte shpallur në kërkim nga Interpol Roma, pasi Gjykata e Venecias/Itali e ka dënuar me 9 vjet e 3 muaj burg, për veprën penale “Shkelje e ligjit mbi narkotikët”, parashikuar nga Kodi Penal italian.

Interpol Tirana, në bashkëpunim me Interpol Romën, vijojnë procedurat për ekstradimin e këtij shtetasi drejt Italisë.

Shtuar 24.03.2021 09:03