Hapet Ambasada e Kosovës në Izrael

Është hapur sot Ambasada e Kosovës në Jeruzalem. Lajmi është bërë i ditur nga Ministria e Jashtme dhe e Diasporës përmes një njoftimi për media.

“Bazuar në Marrëveshjen e Uashingtonit të 4 Shtatorit 2020, ku zyrtarizohet njohja e ndërsjelltë mes Republikës së Kosovës dhe Shtetit të Izraelit dhe Zotimit të Qeverisë së Kosovës ndaj Qeverisë izraelite dhe Administratës amerikane dhe veprimet që janë ndërmarrë nga 1 Shkurti, Ministria e Punëve të Jashtme dhe Diasporës ju njofton se tashmë është hapur edhe zyrtarisht Ambasada e Kosovës në Shtetin e Izraelit, me seli në Jeruzalem”.

Gjithashtu në njoftim thuhet se në pamundësi për të qenë prezentë në Jeruzalem përfaqësues të Kosovës, për shkak të situatës pandemisë, Ministria e Punëve të Jashtme ka udhëzuar të Ngarkuarën me Punë në Izrael që Pllakën e zbuluar nga Ministri Ashkenazi, bashkë me flamurin shtetëror, ta vendosë në objektin e Ambasadës së Kosovës në Jeruzalem.

“Vendosja e pllakës dhe flamurit shtetëror në Ambasadën e Kosovës në Izrael reflekton përkushtimin e Qeverisë së Kosovës për të përmbushur zotimin e dhënë për vendosjen e misionit diplomatik në Jeruzalem”.

“Ambasada e Republikës së Kosovës në Jeruzalem do të përkushtohet fuqimisht për të rritur bashkëpunimin bilateral dhe për forcimin e subjektivitetit ndërkombëtar të shtetit të Kosovës”.

Në ceremoninë e zhvilluar në datën 1 shkurt 2021, Ministri i Jashtëm i Shtetit të Izraelit, z. Gabriel Ashkenazi bëri zbulimin e pllakës së Ambasadës së Republikës së Kosovës në Jeruzalem. Njohja reciproke mes Kosovës dhe Izraelit dhe vendosja e marrëdhënieve diplomatike është rezultat i Marrëveshjes së 4 Shtatorit të nënshkruar në Washington.

Shtuar 14.03.2021 01:03