Gjykata Kushtetuese ka pranuar kërkesën e Astrit Patozit për të shfuqizuar nenin që shpërndan mandatet e deputeteve sipas heresit.
Kjo do të thotë që në zgjedhjet e ardhshme, deputeti që merr më shumë vota hyn në Kuvend, pa pasur rëndësi renditja.
Të lidhura
None found
Pas këtij vendimi ka reaguar Patozi përmes një postimi në Facebook. Ai shkruan se është një vendim i duhur, edhe pse i vonuar.
Reagimi i Patozit:
VENDIM I DUHUR EDHE PSE I VONUAR
E përshëndesim vendimin e sotëm të Gjykatës Kushtetuese për rrëzimin e herësit të Damianit, i cili e mbyllte me dry kinez listën e deputetëve, që e kishte hapur më parë Kushtetuta.
Në pritje të zbardhjes të vendimit, për të cilin nuk besojmë të ketë të papritura, e falenderojmë trupën, që për këtë çështje nuk iu drejtua Komisionit të Venecias.
E kemi ditur që në fillim dhe nuk prisnim që kjo e drejtë do të aplikohej për zgjedhjet e 25 prillit, i cili do të kishte qenë shërbimi i duhur dhe në kohë për demokracinë dhe shtetin tonë të së drejtës. Por tek e fundit, në Shqipëri do të ketë prapë zgjedhje edhe pas 25 prillit. Kjo ishte e vetmja mundësi që kishim për të vlerësuar votën dhe vullnetin e qytetarëve shqiptarë, siç ata e hedhin, dhe ne atë e shfrytëzuam.
Pas kësaj, presim që këtë vendim ta përshëndesë edhe Partia Demokratike, si forca kryesore e opozitës, sepse ajo para zgjedhjeve është shprehur për lista 100 përqind të hapura./albeu.com
