Agron Gjekmarkaj, në cilësinë e kryetart të Komisionit të Edukimit dhe Medias u shpreh se Këshilli Drejtues i Radio Televizionit Shqiptar, nuk ka legjitimitet për të përcaktuar drejtimin e medias publike.
Komentet Gjekmarkaj i bëri, pas mbledhjes së këtij këshilli, sipas tij, ditën e sotme me urgjencë dhe ka vendosur hapjen e garës për pozicionin e drejtorit të institucionit.
Komentet ai i bëri përmes një deklarate në Facebook, ku shtoi se në vend të hapjes së procesit për të zgjedhur drejtorin duhet hapur procesi në Parlament për të formatuar Këshillin Drejtues ashtu siç e kërkon ligji dhe mbi të gjitha interesi publik.
Reagimi i Gjekmarkaj:
Këshilli Drejtues i Radio Televizionit Shqiptar është mbledhur sot me urgjencë dhe ka vendosur hapjen e garës për pozicionin e drejtorit të institucionit!
Ky “këshill” që 6 muaj më parë nxitoi të largonte drejtorin në detyrë, për të krijuar kaos në institucion u vonua 6 muaj të përmbushte detyrimin karshi ligjit.
Përtej nxitimit për t’i ikur ballafaqimit me ligjin, Këshilli aktual nuk ka legjitimitet për të përcaktuar drejtimin e këtij medias publike.
Procesi rrufe i rinovimit të të gjithë anëtarëve të Këshillit Drejtues, përfshirë edhe kryetarin e Këshillit i nisur në shtator të vitit të shkuar u mbyll në mënyrë tragji-komike me përfaqësuesin e “opozitë parlamentare” si kandidat i Partisë Socialiste në qarkun e Beratit. Ky kandidat “përzgjodhi” në emër të opozitës kandidatët për në Këshill Drejtues.
Procesi i zgjedhjes së anëtarëve të Këshillit Drejtues është bërë në kundërshtim me ligjin, është bërë në shkelje të procedurave, është bërë në thyerje të frymës dhe gërmes së ligjit. Arroganca e shumicës ka shkuar deri aty sa të zgjidhen si anëtarë në këtë këshill, kandidatë në konflikt të pastër interesi dhe mbi të gjitha ASNJE kandidat nuk përfaqëson opozitën shqiptare.
RTSH është institucion që në shumicën dërrmuese financohet nga tarifa që paguajnë të gjithë familjet shqiptare. Ligji parashikon që Këshilli Drejtues të jetë i balancuar politikisht në mënyrë që të garantohet jo vetëm përfaqësimi, por edhe pavarësia, integriteti dhe autoriteti i këtij enti publik.
Për gjendjen kaotike ku ndodhet institucioni dhe për përgjegjësitë individuale dhe kolektive mund dhe duhet të shprehen organet e drejtësie. Ajo që opozita kërkon sot është kthimi në rrugën e arsyes, të ligjit dhe të logjikës.
Në vend të hapjes së procesit për të zgjedhur drejtorin duhet hapur procesi në Parlament për të formatuar Këshillin Drejtues ashtu sic e kërkon ligji dhe mbi të gjitha interesi publik./albeu.com/
