EMRI/ “Fshinte” biçikletat nëpër Tiranë, në pranga 32-vjeçari: Në magazinë i gjenden 22 copë

Një 32-vjeçar ka rënë në prangat Policisë së Tiranës i akuzuar për vjedhje të biçikletave.

Pas kapjes së tij, policia e ka marrë në pyetje dhe ai ka treguar vendin se ku i shiste biçikletat që vidhte.

Policia ka shkuar në adresë dhe ka konstatuar 22 biçikleta në një magazinë në Tiranë.

Rrjedhimisht është bërë edhe procedimi penal i pronarit të magazinës, një 50-vjeçar, banues në Tiranë, për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”.

Njoftimi i policisë:

Tiranë

Finalizohet me sukses nga Komisariati i Policisë Nr. 2, operacioni policor i koduar “Twenty two”, për goditjen e veprimtarisë kriminale në fushën e vjedhjes së pronës dhe pasurisë.

Vidhnin biçikleta në zona të ndryshme të Tiranës, vihet në pranga 1 shtetas, i dënuar më parë për të njëjtën veprimtari kriminale, shpallen në kërkim 2 bashkëpunëtorët e tij.

Procedohet penalisht një 50-vjeçar që përvetësonte biçikletat e vjedhura.

Sekuestrohen 22 biçikleta të dyshuara të vjedhura.

Shërbimet e Komisariatit të Policisë Nr. 2, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, bazuar në informacionet e marra në rrugë policore se disa shtetas vidhnin biçikleta në zona të ndryshme të Tiranës, organizuan dhe finalizuan operacionin policor të koduar “Twenty two”.

Si rezultat i këtij operacioni u arrestua në flagrancë shtetasi:

– E. K., 32 vjeç, për veprën penale “Vjedhja”, kryer në bashkëpunim, i dënuar më parë për të njëjtën vepër penale.

Gjithashtu, u shpallën në kërkim bashkëpunëtorët e tij, shtetasi F. B. dhe E. B.

Në vijim të veprimeve u procedua penalisht, në gjendje të lirë, shtetasi A. D., 50 vjeç, banues në Tiranë, për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”.

Shtetasi E. K., më datë 02.09.2022, është kapur në flagrancë nga shërbimet e Komisariatit të Policisë Nr. 2, në rrugën “Nikolla Lena”, duke vjedhur biçikletën e shtetasit I. D.

Nga veprimet hetimore dyshohet se ky shtetas, në bashkëpunim me shtetasit F. B. dhe E. B., gjatë vitit 2022, kanë vjedhur 22 biçikleta në zona të ndryshme të Tiranës, të cilat më pas ia kanë shitur shtetasit A. D.

Gjatë kontrollit të ushtruar në një ambient në administrim nga shtetasi A. D., shërbimet e Policisë gjetën dhe sekuestruan, në cilësinë e provës materiale, 22 biçikleta të dyshuara të vjedhura.

Vijon puna për dokumentimin e vjedhjeve të tjera, që mund të jenë kryer nga këta shtetas.

Materialet i kaluan Prokurorisë, për veprime të mëtejshme procedurale.

#angazhimpërkushtimsakrificë👮🏻👮‍♂️
#tëvendosurkundërkrimit✅
#24/7nëçdoskajtëvendit
#nëshërbimtëqytetarëve👮🏻👮‍♂️🇦🇱/albeu.com

 


Shtuar 3.09.2022 10:53