Raporti i autopsisë ka hedhur dritë mbi vdekjen e Kevin Muharremit, 25-vjeçarit shqiptar të vrarë gjatë natës së 14 shkurtit në Montecalvoli, pjesë e komunës Santa Maria a Monte në Itali.
Dokumenti mjeko-ligjor i hartuar nga Marco Di Paolo përcakton se vetëm një prej predhave të shkrepura nga një pistoletë gjysmëautomatike Beretta e kalibrit 6.35 i shkaktoi vdekjen të riut. Plumbi e kapi Muharremin në pjesën e djathtë të qafës dhe i dëmtoi rëndë shtyllën kurrizore në zonën e vertebrave C2 dhe C3.
Të lidhura
None found
Dëmtimi ndërpreu rrugët nervore, duke sjellë paralizimin e frymëmarrjes dhe një hemorragji të brendshme. Këto pasoja shkaktuan vdekjen e menjëhershme të 25-vjeçarit.
Autopsia u realizua më 13 mars me urdhër të prokurorit të Pizës, Fabio Pelosi, i cili po drejton hetimet për çështjen. Përfundimet e ekzaminimit janë depozituar së fundmi në raportin përkatës.
Nën akuzë për vrasjen është Renato Xyke, një 20-vjeçar shqiptar që banon në Santa Maria a Monte dhe që mbahet në burg që nga dita kur ndodhi krimi. Arrestimi i tij u krye në Arezzo, teksa po largohej së bashku me familjen me një Range Rover Evoque.
Hetuesit dyshojnë se pikërisht nga ky automjet u hap zjarr ndaj Muharremit. Xyke nuk e ka kundërshtuar faktin se qëlloi në drejtim të viktimës, e cila ndodhej në sediljen e pasagjerit të një Fiat Doblò të bardhë dhe u gjet më pas pa shenja jete.
Sipas rindërtimit të deritanishëm, ngjarja ishte përfundimi tragjik i një konflikti ndërmjet dy grupeve shqiptarësh. Përplasja kishte nisur disa orë para vrasjes, ndonëse hetuesit mendojnë se mosmarrëveshjet mund të kenë origjinë edhe më të hershme.
Incidenti i parë u regjistrua brenda një lokali në zonën Capanne di Montopoli, për t’u zhvendosur më pas në parkingun e tij. Dyshohet se pas kësaj palët vazhduan të komunikonin nëpërmjet telefonit, deri në takimin fatal në Viale della Repubblica, ku u krye ekzekutimi.
Ekspertiza ka konstatuar se një predhë tjetër e preku lehtë Kevin Muharremin në parakrahun dhe kyçin e dorës së djathtë. Megjithatë, kjo plagë nuk pati ndikim në vdekjen e tij.
Në skenën e krimit janë shkrepur të paktën gjashtë plumba. Këtë e tregojnë edhe vrimat e konstatuara në pjesën e përparme të automjetit Fiat Doblò.
Renato Xyke nuk është personi i vetëm që po hetohet për ngjarjen. Në të njëjtin automjet me të udhëtonte edhe një shqiptar 18 vjeç, banues në Montecalvoli, ndaj të cilit hetimet po zhvillohen në gjendje të lirë.
18-vjeçari është paraqitur me vullnetin e tij në Prokurori, i shoqëruar nga avokati, ku ka dhënë versionin e vet për atë që ndodhi. Autoritetet italiane po vazhdojnë hetimet për të zbardhur të gjitha rrethanat e krimit, përpara kalimit të dosjes në seancën paraprake gjyqësore.
