Rusia po zhvillon zgjedhjet parlamentare për herë të parë që prej nisjes së pushtimit të plotë të Ukrainës, në një atmosferë të tensionuar politike ku forcat opozitare kritike ndaj Kremlinit janë përjashtuar nga gara.
Të lidhura
None found
Procesi zgjedhor zgjat tre ditë dhe qytetarët rusë votojnë për 450 anëtarët e Dumës së Shtetit, dhomës së ulët të parlamentit.
Dominimi i Partisë Rusia e Bashkuar, e cila mbështet Presidentin Vladimir Putin dhe ka qenë forca kryesore e politikës ruse për më shumë se dy dekada, pritet të vijojë edhe pas këtyre zgjedhjeve.
Një pamje që pasqyron situatën politike u regjistrua në qytetin e Ryazanit. Gjatë një debati televiziv në kanalin Russia-1, asnjë nga gjashtë kandidatët e regjistruar nuk u shfaq në studio, duke lënë përballë moderatores vetëm podiumet e zbrazëta.
Jashtë zgjedhjeve ka mbetur edhe Yabloko, parti që kundërshton luftën dhe kishte zhvilluar fushatë në favor të një armëpushimi dhe negociatave për përfundimin e konfliktit në Ukrainë. Gjykata e Lartë ruse e ndaloi atë pak kohë pasi ishte regjistruar për pjesëmarrje në proces.
Udhëheqësit e Yablokos e kanë përshkruar vendimin si politik. Nga ana tjetër, autoritetet ruse pretendojnë se partia ka shkelur rregullat për financimin e huaj dhe të drejtat e autorit.
Vëmendje dhe polemika ka ngjallur edhe votimi elektronik. Në Moskë, qytetarëve që votojnë online ose përdorin terminalet elektronike në qendrat e votimit u ofrohen pikë, të cilat mund t’i shkëmbejnë me çmime, në vend që të votojnë me fletë letre.
Transparenca e këtij sistemi është vënë prej kohësh në dyshim nga kritikët. Zgjedhjet po mbahen ndërkohë që lufta në Ukrainë ka hyrë në vitin e pestë. Sulmet me dronë ukrainas brenda territorit rus po ndikojnë gjithnjë e më shumë në jetën e përditshme, ndërsa goditjet ndaj rafinerive të naftës kanë sjellë vështirësi në furnizimin me karburant në disa rajone.
Një rol të rëndësishëm në këtë garë po luajnë edhe veteranët e luftës. Të dhënat e cituara nga CNN tregojnë se 186 veteranë të luftës në Ukrainë kandidojnë për Dumën e Shtetit, ndërsa mbi 1,500 ish-ushtarakë kërkojnë poste në nivel rajonal dhe lokal.
Në Moskë, disa votues kanë shprehur shqetësim për luftën dhe drejtimin e ardhshëm të vendit. Raisa tha se dëshiron që konflikti të përfundojë dhe shpreson për një të ardhme “paqësore”.
Marina Alexandrovna, 73 vjeçe, deklaroi se ende nuk e kishte përcaktuar se për cilin kandidat do të votonte. Ajo tha se nuk i pëlqen mënyra se si po zhvillohen ngjarjet politike, por nuk sheh shumë mundësi për t’i ndryshuar ato.
Sipas analistëve të cituar nga CNN, për Kremlinin këto zgjedhje shërbejnë edhe si një mundësi për të treguar mbështetjen e publikut ndaj politikave të Vladimir Putinit gjatë luftës. Ndërkohë, në rrjetet sociale ruse janë shtuar spekulimet për një mobilizim të ri ushtarak pas përfundimit të zgjedhjeve, pretendime që Kremlini i ka mohuar.
Votimi po zhvillohet edhe në territoret ukrainase që Rusia pretendon se i ka aneksuar, mes tyre Krimea dhe pjesë të Donetskut, Luhanskut, Khersonit dhe Zaporizhzhias. Ukraina dhe shumica e komunitetit ndërkombëtar nuk i njohin këto aneksime.
Për Kremlinin, zgjedhjet zhvillohen në një pikë kyçe politike, ndërsa lufta vazhdon dhe presioni mbi ekonominë dhe shoqërinë ruse mbetet i fortë.
