Një tjetër natë përplasjesh ndërkufitare u shënua mes Ukrainës dhe Rusisë, teksa Kievi bëri të ditur të shtunën se kishte ndërmarrë një sulm me rreze të gjatë veprimi ndaj një objekti ushtarako-industrial në Volgograd, ndërsa Moska nisi një valë dronësh drejt territorit ukrainas.
Presidenti i Ukrainës, Volodymyr Zelensky, deklaroi se raketat ukrainase FP-5 “Flamingo” goditën uzinën Titan-Barrikady.
Të lidhura
None found
Në një postim në Telegram të shtunën, Zelensky theksoi se “çdo objekt mbrojtës rus që punon për luftën kundër Ukrainës është një shënjestër e ligjshme për sulmet tona me rreze të gjatë veprimi”. Ai shtoi se raketat “goditën me sukses ndërmarrjen Titan-Barrikady në Volgograd”, të cilën e përshkroi si “një kompleks të madh industrial ku armiku prodhon sisteme artilerie dhe pajisje ushtarake të specializuara, përfshirë elementë për raketahedhësit që përdoren për t’i goditur njerëzit tanë”.
Sipas tij, pas një prej goditjeve shpërtheu zjarr në territorin e uzinës. Zelensky falënderoi gjithashtu Forcat Mbrojtëse të Ukrainës “për saktësinë e tyre”.
Objekti Titan-Barrikady ndodhet në qarkun Krasnoktiabrski të Volgogradit dhe lidhet me prodhimin e sistemeve të artilerisë, pajisjeve të specializuara ushtarake dhe komponentëve për sistemet e raketahedhësve.
Pamje të publikuara në internet shfaqnin shpërthime dhe re tymi që ngriheshin mbi uzinë pas sulmit të raportuar. Guvernatori i Volgogradit, Andrey Bocharov, pranoi se predha ukrainase “me shpejtësi të lartë” kishin goditur qytetin dhe kishin dëmtuar objektet e prodhimit në një ndërmarrje në qarkun e Krasnoktiabrskit.
Bocharov tha se nga sulmi mbetën të plagosur 10 persona. Ai nuk e përmendi me emër objektin e goditur, por Titan-Barrikady ndodhet pikërisht në atë qark.
Në të njëjtën kohë, Rusia zhvilloi një tjetër sulm të madh me dronë kundër Ukrainës gjatë natës së 26–27 qershorit. Sipas Forcave Ajrore të Ukrainës, forcat ruse përdorën 129 dronë, mes tyre dronë sulmues të tipit Shahed, dronë Gerbera dhe Italmas, si edhe dronë mashtrues Parodiya.
Sipas autoriteteve ukrainase, këta dronë u nisën nga disa drejtime, përfshirë Kursk, Briansk, Millerovo, Oriol dhe Primorsko-Akhtarsk në Rusi, si edhe nga Krimea e pushtuar dhe Donjecku i pushtuar.
Ukraina njoftoi se mbrojtja ajrore e saj rrëzoi 113 dronë në veri, jug dhe lindje të vendit. Zyrtarët thanë se 13 dronë goditës arritën objektivat në shtatë lokacione, ndërsa mbetjet e dronëve të neutralizuar ranë në edhe tre zona të tjera.
Në rajonin verilindor të Sumit, autoritetet lokale deklaruan të shtunën se gjatë më shumë se 60 sulmeve ruse në 24 orët e fundit u vra një person dhe u plagosën 14 të tjerë. Po ashtu, u raportuan dëme në banesa, automjete dhe infrastrukturë civile në këtë rajon kufitar.
Përplasjet e natës ndodhën paralelisht me tensionet në rritje në Krimenë e pushtuar, ku autoritetet e vendosura nga Rusia shpallën gjendje emergjence pas sulmeve të pandërprera ukrainase në gadishull.
Sergei Aksyonov, udhëheqësi i Krimesë i emëruar nga Rusia, tha se kjo masë synonte të lehtësonte menaxhimin e procedurave për dëmet dhe kërkesat për kompensim. Vendimi erdhi në kushtet e raportimeve për ndërprerje të energjisë elektrike, kufizime të karburantit dhe presion në rritje mbi infrastrukturën vendore.
Autoritetet njoftuan për probleme të vazhdueshme me furnizimin me energji në Krime dhe Sevastopol, ndërsa shitja e karburantit është kufizuar. Zyrtarët pezulluan gjithashtu pranimin e fëmijëve në kampet verore për pjesën e mbetur të sezonit, ndonëse sezoni turistik nuk u anulua zyrtarisht.
Në mes të luftimeve, më 26 qershor Rusia dhe Ukraina realizuan një tjetër shkëmbim të të burgosurve, ku secila palë mori mbrapsht 160 të burgosur lufte. Ky shkëmbim, i ndërmjetësuar nga Emiratet e Bashkuara Arabe, mbetet një nga fushat e rralla ku Moska dhe Kievi vazhdojnë të koordinohen.
Zelensky konfirmoi se 160 ushtarë ukrainas janë kthyer nga robëria ruse. Sipas tij, pothuajse të gjithë mbaheshin të burgosur që nga viti 2022 dhe mes tyre kishte mbrojtës të Mariupolit dhe të uzinës së çelikut Azovstal.
Ai tha gjithashtu se që nga nisja e pushtimit në shkallë të plotë janë kthyer më shumë se 9.500 njerëz, përfshirë 1.596 ukrainas në vitin 2026.
Ndërkaq, Shtabi i Përgjithshëm i Ukrainës raportoi se gjatë 24 orëve të fundit Rusia humbi 1.350 trupa, si dhe tanke, mjete të blinduara, sisteme artilerie, dronë, raketa dhe pajisje të tjera.
Rusia nuk publikon rregullisht të dhëna të ngjashme nga fusha e betejës dhe pretendimet e të dyja palëve nuk mund të verifikohen në mënyrë të pavarur./REL
