Administrata Trump po përgatitet të shtojë ndjeshëm numrin e çështjeve për heqjen e shtetësisë amerikane ndaj qytetarëve të natyralizuar, raportoi CNN, duke iu referuar një zyrtari të lartë të Departamentit të Drejtësisë.
Kjo lëvizje lidhet me qasjen më të gjerë të qeverisë Trump ndaj emigracionit, e cila nuk fokusohet vetëm te personat pa dokumente, por përfshin edhe rishqyrtimin e statusit të një pjese të qytetarëve të natyralizuar.
Të lidhura
None found
Sipas të dhënave të publikuara, deri në muajin tetor pritet të depozitohen të paktën 250 raste për “denatyralizim”. Vetëm gjatë dy muajve të fundit janë paraqitur 29 çështje ndaj personave të lindur jashtë SHBA-së, të cilët akuzohen se e kanë fituar shtetësinë në mënyrë të paligjshme ose me anë të mashtrimit.
Krahasuar me të kaluarën, bëhet fjalë për një rritje të fortë. Nga viti 2008 deri më 12 qershor 2026, ishin regjistruar në total 166 raste, me një mesatare prej më pak se 10 në vit.
Burime nga Departamenti i Drejtësisë bëjnë të ditur se për trajtimin e këtyre çështjeve janë zhvendosur edhe burime njerëzore nga sektorë të tjerë. Autoritetet amerikane nënvizojnë se heqja e shtetësisë është një instrument ligjor që përdoret prej dekadash dhe zbatohet kur provohet se ajo është përfituar përmes deklarimeve të rreme ose kur personi nuk ka qenë ligjërisht i kualifikuar për ta marrë.
Çështjet e hapura deri më tani përfshijnë individë të akuzuar për mashtrim, abuzim të të miturve ose mbështetje të terrorizmit gjatë ose përpara procesit të natyralizimit.
