Presidenti i Shteteve të Bashkuara, Donald Trump, tha se Vladimir Putin nuk planifikon të sulmojë vendet anëtare të NATO-s, edhe pse përplasjet mes Rusisë dhe Perëndimit janë thelluar për shkak të luftës në Ukrainë.
Të lidhura
None found
Trump i bëri komentet gjatë një komunikimi me gazetarët në Zyrën Ovale, ku konfirmoi se kishte zhvilluar një bisedë me presidentin rus. Sipas tij, takimi telefonik ishte pozitiv.
“Kam folur me të për këtë. Patëm një bisedë të mirë. Ai nuk do të sulmojë”, deklaroi Trump, duke nënvizuar se Putin nuk do të godasë territoret e vendeve të NATO-s.
Ndërkohë, deklaratat amerikane u bënë në një periudhë kur tensionet mes Moskës dhe shteteve perëndimore kanë marrë sërish përmasa të mëdha.
Rusia ka kërcënuar me masa hakmarrëse ndaj bazave dhe objekteve ushtarake britanike, pasi Ukraina përdori armë të dërguara nga Londra për sulme kundër rafinerive dhe infrastrukturës ruse.
Ministria e Jashtme e Rusisë ka deklaruar se çdo objekt ose pajisje ushtarake britanike mund të shënjestrohet nga një reagim i mundshëm, qoftë brenda territorit ukrainas apo jashtë tij.
Megjithatë, burime të Bashkimit Europian në Bruksel kanë thënë se, në këtë fazë, nuk ka një kërcënim të menjëhershëm për sulm rus ndaj vendeve europiane ose shteteve anëtare të NATO-s.
