Presidenti amerikan Donald Trump i ka bërë thirrje kryeministrit izraelit Benjamin Netanyahu që të fillojë largimin e trupave izraelite nga Siria dhe të marrë masa të ngjashme edhe në jug të Libanit. Kërkesa është bërë gjatë një telefonate të enjten, sipas Axios, që citon zyrtarë amerikanë dhe izraelitë.
Të lidhura
None found
Gjatë bisedës, Trump i ka përcjellë Netanyahut shqetësimin se prania e ushtrisë izraelite në territorin sirian po shton tensionet dhe rrezikon zgjerimin e konfliktit. “Ata nuk të duan atje. Duhet të tërhiqesh”, raportohet t’i ketë thënë presidenti amerikan, duke nënvizuar se e njëjta qasje duhet ndjekur edhe për Libanin.
Telefonata u zhvillua një ditë pas takimit të Trump me presidentin sirian Ahmed al-Sarrah, në kuadër të Samitit të NATO-s në Turqi.
Sipas burimeve amerikane, administrata Trump po punon prej disa muajsh për të ndërmjetësuar një marrëveshje të re sigurie ndërmjet Izraelit dhe Sirisë. Bisedimet, megjithatë, kanë mbetur në vend për shkak të ngurrimit të Izraelit për t’u larguar nga zonat siriane të pushtuara pas rrëzimit të regjimit të Bashar al-Assad në dhjetor 2024.
Netanyahu, nga ana tjetër, ka ngritur në bisedë nevojën për krijimin e zonave të sigurisë përgjatë kufijve të Izraelit. Qeveria izraelite argumenton se ruajtja e pranisë ushtarake në Siri dhe në Libanin jugor është e nevojshme për të shmangur sulme të ngjashme me ato të 7 tetorit.
Në jug të Libanit, ndërkohë, vijojnë përpjekjet diplomatike për zbatimin e një marrëveshjeje që parashikon tërheqjen graduale të forcave izraelite nga dy zonat që mbeten nën kontrollin e tyre, si edhe vendosjen e ushtrisë libaneze. Edhe pse Izraeli ka marrë përsipër zbatimin e kësaj marrëveshjeje, procesi ende nuk ka filluar.
Kërkesa e Trump vjen në një periudhë delikate politike për Netanyahun, teksa Izraeli po shkon drejt zgjedhjeve që shihen si vendimtare për të ardhmen e tij politike. Sidoqoftë, zyrtarët e cituar nga Axios vlerësojnë se kryeministri izraelit nuk pritet të kryejë tërheqje të rëndësishme përtej zotimeve që ka marrë deri tani.
Shtëpia e Bardhë nuk dha një koment zyrtar mbi përmbajtjen e telefonatës, por as nuk i kundërshtoi raportimet. Një zyrtar amerikan i tha Axios se raportet mes Trump dhe Netanyahut vazhdojnë të jenë të forta, ndërsa Izraeli mbetet aleat strategjik i Shteteve të Bashkuara.
