Ngjarjet e fundit mes Shteteve të Bashkuara dhe Iranit po shtojnë pasigurinë në një prej korridoreve detare më jetike në botë, duke nxitur shqetësime për pasojat që mund të kenë në ekonominë globale.
Të lidhura
None found
Vëmendja është përqendruar sërish te Ngushtica e Hormuzit, pasi Shtetet e Bashkuara vijuan për dy ditë me radhë bombardimet ndaj objektivave në Iran, ndërsa Teherani u kundërpërgjigj me sulme raketore kundër bazave amerikane në rajonin e Gjirit.
Mohammad Bagher Ghalibaf, shefi i negociatorëve iranianë, u shpreh se “kur godet, duhet të presësh edhe që të goditesh”. Ai nënvizoi gjithashtu se lundrimi në Hormuz do të rifillojë vetëm “sipas rregullave të vendosura nga Irani”.
Pavarësisht kësaj, gjatë ditës së djeshme anijet kanë vijuar kalimin nëpër Ngushticë, edhe pse analistët e sektorit detar e përshkruajnë situatën si “shumë të paqëndrueshme”.
Bridget Diakun, analiste në Lloyd’s List Intelligence, deklaroi se një pjesë e anijeve po lëvizin “në errësirë”, duke fikur sistemet e transmetimit të pozicionit gjatë kalimit në këtë rrugë strategjike detare.
Nga ana tjetër, Operacionet e Tregtisë Detare të Mbretërisë së Bashkuar bënë të ditur se qarkullimi detar po vazhdon në nivele më të ulëta, duke përdorur si korridorin jugor pranë brigjeve të Omanit, ashtu edhe itinerarin verior afër ujërave nën kontrollin e Iranit.
Sipas UKMTO-së, ritmi aktual i lundrimit tregon se kompanitë e transportit detar po sillen me kujdes, edhe pse kalimet e kryera nën shoqërimin e forcave amerikane raportohet se kanë vazhduar pa ndërprerje gjatë kësaj jave.
