Presidenti i Çekisë, Petr Pavel, ka vlerësuar se Ukraina ka në dispozicion vetëm dy muaj për të rikthyer bisedimet e paqes me Rusinë, pasi në të kundërtën presidenti rus Vladimir Putin mund të ndërmarrë një përshkallëzim të madh të konfliktit pas zgjedhjeve parlamentare ruse të 20 shtatorit.
Të lidhura
None found
Në një intervistë për The Telegraph, dhënë në margjinat e samitit të NATO-s në Ankara, ish-gjenerali dhe ish-kryetari i Komitetit Ushtarak të NATO-s u shpreh se Putini mund të japë urdhër për mobilizim të përgjithshëm menjëherë pas mbylljes së procesit zgjedhor në Rusi, duke qenë se një hap i tillë do të ishte politikisht i vështirë para votimeve.
“Besoj se dritarja është ende e hapur për të vazhduar presionin dhe për t’i dërguar një mesazh të qartë Rusisë se ne jemi të gatshëm të fillojmë negociatat”, tha Pavel.
Ai nënvizoi se javët në vijim duhet të shfrytëzohen nga aleatët perëndimorë për të shtuar trysninë ndaj Kremlinit, me synimin për ta detyruar Rusinë të rikthehet në tryezën e bisedimeve.
Sipas presidentit çek, Moska po has probleme të shumta të brendshme, ndërsa sulmet pothuajse të përditshme me dronë ukrainas brenda territorit rus kanë goditur objektiva strategjikë, mes tyre Moskën, infrastrukturën energjetike në Siberinë Perëndimore dhe linjat e furnizimit me karburant drejt Krimesë së pushtuar.
Paveli vlerësoi se këto goditje, të kombinuara me mbështetjen e pandërprerë ushtarake të Perëndimit për Kievin, mund ta bindin Kremlinin se negociatat përbëjnë një zgjidhje më të favorshme sesa vijimi i luftës.
Duke folur për samitin e NATO-s në Ankara, ai rrëzoi shqetësimet se presidenti amerikan Donald Trump mund të sillte përçarje mes aleatëve.
Sipas tij, samiti përmbushi objektivat themelore duke treguar rritje të shpenzimeve për mbrojtjen nga vendet anëtare, ruajtje të unitetit të Aleancës dhe rikonfirmim të mbështetjes për Ukrainën.
Pavel tha gjithashtu se takimet me dyer të mbyllura u zhvilluan në një klimë shumë më pozitive nga sa ishte parashikuar.
“Presidenti Trump tha se ishte i impresionuar nga fryma në dhomë”, deklaroi ai, teksa shtoi se gjatë bisedimeve nuk u diskutuan komentet e mëparshme të Trump për Groenlandën.
Në samit u trajtuan edhe masa konkrete për fuqizimin e mbrojtjes ajrore të Ukrainës, përfshirë një plan të Norvegjisë për t’i siguruar Kievit më shumë raketa tokë-ajër.
Megjithatë, presidenti çek tërhoqi vëmendjen se nevoja për sisteme të avancuara mbrojtëse po i tejkalon kapacitetet aktuale prodhuese të industrisë së armëve.
Për këtë, ai hodhi idenë e një modeli të ri të quajtur “Strategjia e Mbrojtjes 3.0”, që parashikon që vendet e NATO-s të mbajnë rezerva të mjaftueshme armësh me kosto më të ulët për të paktën 30 ditë, ndërsa industria e mbrojtjes të ketë mundësi të rrisë me shpejtësi prodhimin e armëve më të sofistikuara, si raketat me rreze të gjatë veprimi dhe interceptorët e mbrojtjes ajrore.
Në fund, Pavel theksoi se, pavarësisht debateve për forcimin e mbrojtjes evropiane, qasja e NATO-s ndaj parandalimit bërthamor mbetet e pandryshuar.
