Tetë ditë pas tërmeteve të forta që goditën Venezuelën më 24 qershor, një burrë është nxjerrë i gjallë nga rrënojat e një godine të shembur.
I mbijetuari, Hernan Gil, u shpëtua në përfundim të një operacioni të vështirë, mbi 100 orë pasi ekipet e kërkim-shpëtimit kishin arritur të përcaktonin vendndodhjen e tij nën afro 140 tonë mbetje ndërtimore. Në këtë mision u angazhuan qindra efektivë nga Venezuela, Kili, Kosta Rika, El Salvadori, Meksika, Portugalia dhe Shtetet e Bashkuara.
Të lidhura
None found
Një zjarrfikës nga Kili tha se ky ishte “operacioni më kompleks dhe teknikisht më i vështirë” që kishte përjetuar gjatë karrierës. Gjatë ndërhyrjes, kalimet e hapura për të depërtuar te i mbijetuari u shembën disa herë, duke vënë në rrezik si shpëtimtarët, ashtu edhe vetë Gilin.
Ekipet arritën ta shihnin fillimisht përmes një kamere të vogël dhe më pas i dërguan ujë, maskë mbrojtëse, syze dhe serum. Mjekët bënë të ditur se gjendja e tij ishte e qëndrueshme dhe se, në mënyrë të jashtëzakonshme, ai nuk kishte marrë lëndime të rënda.
Anëtarët e ekipit të shpëtimit treguan se “Hernán na fliste vazhdimisht, na inkurajonte të vazhdonim dhe madje kërkonte pije me shijet e tij të preferuara”.
Në momentin kur dy tërmetet goditën, Gil ndodhej në një kabinë betoni në bodrumin e parkimit pranë qendrës tregtare Galerias Playa Grande, në qytetin Catia La Mar. Autoritetet shpjeguan se forma e asaj strukture krijoi një “guaskë” mbrojtëse, e cila i shpëtoi jetën.
Sipas bilancit zyrtar, numri i viktimave nga dy tërmetet ka shkuar në rreth 2.300, ndërsa dhjetëra mijëra njerëz rezultojnë ende të zhdukur.
