Dy zjarrfikës, 23 dhe 44 vjeç, humbën jetën dhe një tjetër u plagos pasi një pjesë e një godine u shemb gjatë ndërhyrjes për shuarjen e zjarrit. Ngjarja ndodhi të shtunën pasdite në Zefyr, në bashkinë e Fylit, në Greqi.
Godina e braktisur ndodhej në rrugën Katsantoni. Autoritetet morën njoftimin rreth orës 11:40 dhe në vend dërguan 20 zjarrfikës me gjashtë automjete, nga disa stacione të Athinës, si dhe forca të Njësisë Speciale të Menaxhimit të Fatkeqësive (EMAK).
Të lidhura
None found
Ndërsa zjarrfikësit po punonin brenda ndërtesës, një pjesë e saj u shemb dhe disa efektivë mbetën të bllokuar. Dy u nxorën fillimisht pa ndjenja nga rrënojat dhe u dërguan me ambulancë në një spital në Atikë. Më pas, ekipet e shpëtimit nxorën edhe një efektiv tjetër, i cili ishte plagosur.
Shkaku i saktë i vdekjes së dy zjarrfikësve ende nuk është përcaktuar. Autoritetet po hetojnë nëse ata u asfiksuan nga tymi dhe kushtet e vështira brenda godinës, apo nëse u goditën nga materialet ndërtimore gjatë shembjes.
Ekspertë të Departamentit të Hetimit të Zjarreve në Athinë kanë shkuar në vendngjarje për të zbardhur si shkaqet e zjarrit, ashtu edhe ato të shembjes së ndërtesës.
Ngjarja ka tronditur shërbimin zjarrfikës grek. Evangelos Tournas, ministri i Krizave Klimatike dhe Mbrojtjes Civile, u shprehu ngushëllime familjeve të dy efektivëve që humbën jetën në detyrë.
“Sot, familja e Shërbimit Zjarrfikës mban zi për dy prej njerëzve të saj, të cilët humbën jetën në krye të detyrës”, tha ministri. Ai i uroi gjithashtu zjarrfikësit të plagosur shërim të shpejtë dhe të plotë.
