Uashingtoni pret që Hamasi të nisë së shpejti çarmatimin në Gaza, ndërsa ka sinjalizuar se do të mbështesë veprime të tjera ushtarake të Izraelit nëse grupi palestinez nuk respekton angazhimet e marra.
Të lidhura
None found
I dërguari special amerikan Jared Kushner deklaroi se situata në Gaza mund të përparojë shpejt nëse palët bashkëpunojnë. Në një intervistë për Fox News, pas takimit me kryeministrin izraelit Benjamin Netanyahu, ai tha se Hamasi ka 60 deri në 90 ditë për të dëshmuar gatishmërinë për çarmatim.
“Nëse Hamasi i dorëzon armët në tunele me dëshirë gjatë 60 deri në 90 ditëve të ardhshme, kjo do të ishte eliminimi i një kërcënimi të madh sigurie për Izraelin”, u shpreh Kushner.
Ai paralajmëroi se mosrespektimi i marrëveshjes për çarmatim do t’i sillte Izraelit mbështetje më të gjerë nga SHBA-të dhe vende të tjera për ndërmarrjen e hapave të mëtejshëm.
“Nëse nuk e zbatojnë tani angazhimin e tyre, të gjithë do të shohin se nuk janë të sinqertë për paqen dhe se Izraeli do të ketë shumë më tepër mbështetje nga SHBA-të dhe të tjerët për ta përfunduar punën në mënyrën e duhur”, tha ai.
Kushner tregoi se përfaqësuesit e Hamasit, gjatë takimit të së dielës, “thanë të gjitha gjërat e duhura”. Megjithatë, ai shtoi se SHBA-të e kanë të vështirë t’u besojnë për shkak të historikut të organizatës.
Sipas tij, tashmë Hamasit do t’i jepet mundësia të provojë përmes veprimeve konkrete nëse e ka seriozisht procesin e paqes.
I dërguari amerikan zhvilloi edhe një takim rreth katërorësh me Benjamin Netanyahun, të cilin e cilësoi si “shumë, shumë të mirë”. Në bisedime u trajtuan shqetësimet e kryeministrit izraelit, mes tyre e drejta e Izraelit për vetëmbrojtje dhe rindërtimi i Gazës.
Kushner tha se hapat fillestarë mund të hidhen brenda 30 ditëve. Objektivi është që fillimisht të nisë nxjerrja e armëve nga tunelet, ndërsa gjatë 60-90 ditëve të ardhshme të trajtohet edhe rrjeti i tuneleve.
