Kremlini ka reaguar me tone të ashpra ndaj vendimit të Lituanisë për të ndryshuar ndalimin kushtetues që pengon vendosjen e armëve bërthamore në territorin e saj.
Të lidhura
None found
Zëdhënësi i Kremlinit, Dmitry Peskov, deklaroi se afrimi i infrastrukturës ushtarake amerikane me kufijtë rusë, si dhe mundësia e dislokimit të armëve bërthamore në një shtet fqinj, përbëjnë hapa që mund të rrisin tensionet në rajon.
Peskov iu përgjigj pyetjeve të gazetarëve lidhur me qëndrimin e Moskës ndaj vendimit të parlamentit lituanez dhe ndaj propozimit të bërë këtë muaj nga presidenti amerikan Donald Trump për ngritjen e një baze ushtarake amerikane në Lituani.
“Natyrisht, kjo nuk mund të shihet ndryshe veçse si një hap drejt përshkallëzimit të tensioneve”, u shpreh ai. Sipas Peskovit, i njëjti vlerësim vlen edhe për vendosjen e mundshme të armëve bërthamore në territorin e një vendi që kufizohet me Rusinë.
Lituania është anëtare e Bashkimit Europian dhe NATO-s, ndërsa ndan kufi me Rusinë dhe Bjellorusinë, aleate e ngushtë e Moskës.
Parlamenti lituanez e miratoi ndryshimin në votimin e parë, ndërsa për hyrjen e tij në fuqi nevojiten dy votime të veçanta dhe mbështetja e dy të tretave të deputetëve.
Ndalimi i armëve nukleare ishte vendosur më shumë se tri dekada më parë, pas shkëputjes së Lituanisë nga Bashkimi Sovjetik.
Ndërkohë, SHBA-ja ka mbajtur në Lituani që prej vitit 2019 një batalion të blinduar me afro 1,000 trupa, prania e të cilëve organizohet përmes rotacionit.
