Qeveria e kryeministrit Pedro Sanchez pësoi një disfatë në Parlament, pasi deputetët votuan kundër dy dekreteve emergjente për strehimin. Pas këtij zhvillimi, Spanja mund të përballet me zgjedhje të parakohshme këtë vjeshtë.
Të lidhura
None found
Dekreti i parë u hodh poshtë me 178 vota kundër dhe 172 pro, ndërsa i dyti mori 184 vota kundër dhe 166 pro. Presioni ndaj Sanchezit për të shpallur zgjedhje të parakohshme është rritur; 29 nëntori po përmendet si një datë e mundshme.
Në Madrid, mijëra protestues vazhdojnë të mblidhen në sheshin Puerta del Sol. Komiteti i qiramarrësve, që organizon protestat, ka njoftuar tubime më 3 tetor në kryeqytet dhe në 22 qytete të tjera spanjolle.
Gjatë fjalës në Parlament, Sanchez u shpreh se dekretet nuk përmbanin “asnjë ekstremizëm” dhe u kërkoi deputetëve të merrnin parasysh vështirësitë e familjeve përballë rritjes së qirave. Partia Popullore, forca kryesore opozitare, kundërshtoi këtë qasje, duke thënë se zgjidhja e krizës kërkon ndërtimin e banesave të reja dhe jo miratimin e dekreteve.
Qeveria spanjolle synonte përmes masave të kufizonte spekulimet në tregun e pasurive të paluajtshme, shtimin e qirave turistike dhe dëbimet e personave në nevojë. Ndër propozimet që ngjalli më shumë debat ishte vazhdimi automatik dhe pa afat i kontratave të qirasë.
