Princi Harry dhe Meghan Markle pritet të largohen nga Shtetet e Bashkuara dhe të vendosen sërish në Mbretërinë e Bashkuar në fund të gushtit, raportoi BBC. Çifti ka në plan të jetojë në një banesë private, jashtë Londrës, pa u rikthyer në angazhimet zyrtare të familjes mbretërore.
Të lidhura
None found
Edhe fëmijët e tyre, Princi Archie, 7 vjeç, dhe Princesha Lilibet, 5 vjeç, pritet të nisin shkollën në shtator, pasi janë regjistruar në një institucion arsimor britanik.
Sipas BBC, Mbreti Charles III u vu në dijeni për vendimin të dielën. Megjithatë, kthimi në Britani nuk do të ndryshojë statusin e Harry-t dhe Meghan-it, të cilët do të vazhdojnë të jetojnë si persona privatë dhe jo si anëtarë aktivë të familjes mbretërore.
Mbreti Charles shpreson të kalojë më shumë kohë me familjen
Burime të BBC bëjnë të ditur se Mbreti nuk kishte dijeni për planet e çiftit deri përpara fundjavës së kaluar. Pavarësisht kësaj, ai e ka mirëpritur mundësinë për të qenë më pranë djalit dhe nipërve të tij, në kuadër të një marrëdhënieje private dhe familjare.
Princi Harry dhe Meghan vizituan Charles-in në rezidencën e tij në Highgrove gjatë korrikut, por gjatë atij takimi nuk u diskutua për zhvendosjen e tyre në Britani.
Për planet e Sussex-ëve janë informuar gjithashtu Princi Ëilliam dhe Princesha Catherine. Rikthimi i familjes vjen pas një periudhe të gjatë përplasjesh dhe marrëdhëniesh të tensionuara brenda monarkisë.
Largimi nga Britania ndodhi në vitin 2020
Harry dhe Meghan u larguan nga Britania në fillim të vitit 2020, kur hoqën dorë nga detyrat si pjesëtarë aktivë të familjes mbretërore. Në mars të po atij viti, ata u vendosën në Kaliforni dhe prej atëherë kanë jetuar në SHBA.
Takimi i korrikut me Mbretin Charles dhe Mbretëreshën Camilla u pa si një hap i rëndësishëm drejt përmirësimit të lidhjeve familjare. Pallati Mbretëror e përshkroi vizitën në rezidencën private të Mbretit në Gloucestershire si një “takim familjar privat”.
Ajo ishte hera e parë pas më shumë se katër vitesh që Charles i takonte personalisht nipërit e tij. Harry dhe Meghan nuk kishin qenë së bashku në Britani që prej vitit 2022, kur morën pjesë në ceremoninë mortore të Mbretëreshës Elizabeth II.
Çështja e sigurisë vazhdon të jetë e ndjeshme
Siguria mbetet një nga shqetësimet kryesore të Princit Harry gjatë udhëtimeve në Britani. Vitin e kaluar, ai humbi një proces gjyqësor për nivelin e mbrojtjes policore që i ofrohet atij dhe familjes së tij gjatë qëndrimit në vend. Pas heqjes dorë nga detyrat mbretërore dhe transferimit në SHBA, niveli i sigurisë së tij u ul.
Harry ka thënë më herët se shqetësimet për mbrojtjen kanë qenë një prej arsyeve që e kanë bërë të hezitojë të rikthehet në Britani bashkë me bashkëshorten dhe fëmijët.
Pas lajmit për zhvendosjen, një zëdhënës i Ministrisë së Brendshme britanike deklaroi se vendimet mbi sigurinë e anëtarëve të familjes mbretërore merren nga Komiteti Ekzekutiv për Mbrojtjen e Familjes Mbretërore dhe Personave Publikë (Ravec). Ai e cilësoi sistemin britanik të sigurisë si “rigoroz dhe proporcional”.
Invictus Games, një tjetër arsye për praninë e Harry-t në Britani
Gjatë vizitës së korrikut, Princi Harry promovoi Invictus Games, aktivitetin sportiv kushtuar ushtarakëve dhe veteranëve të plagosur. Eventi do të mbahet në Birmingham vitin e ardhshëm.
David Ëiseman, drejtues i programeve dhe strategjisë në Invictus Games Foundation, e përshëndeti lajmin për kthimin e Harry-t në Britani.
“Do të jem shumë i kënaqur ta kem sërish në vend. Zhvendosja është stresuese për këdo, ndaj shpresoj që gjithçka të shkojë mirë dhe fëmijët të përshtaten me shkollën”, tha ai.
Nuk dihet nëse kthimi do të jetë i përhershëm
Ende mbetet e paqartë nëse zhvendosja e familjes do të jetë përfundimtare apo do të përbëjë një qëndrim afatgjatë në Britani.
Që prej vitit 2020, Harry dhe Meghan kanë krijuar jetën e tyre në SHBA, ndërsa aktivitetet e tyre profesionale dhe publike janë të përqendruara kryesisht në Kaliforni.
Megjithatë, regjistrimi i Archie-t dhe Lilibet-it në një shkollë britanike, së bashku me planin për të pasur një shtëpi pranë Londrës, tregon se çifti po përgatitet të jetë shumë më i pranishëm në Mbretërinë e Bashkuar.
Edhe pas rikthimit, nuk parashikohet ndonjë ndryshim në statusin zyrtar të tyre. Harry dhe Meghan do të vijojnë jetën si persona privatë, por do të jenë fizikisht më pranë familjes mbretërore.
