Dan Thomas është tërhequr nga drejtimi i Reform UK në Uells dhe nga posti i liderit të opozitës në Senedd, pasi u arrestua nën dyshimin për sulm dhe sjellje kontrolluese. Ai është liruar me kusht, pa iu ngritur akuza, ndërsa hetimet policore vazhdojnë.
Të lidhura
None found
Dorëheqja u bë publike të martën. Thomas, i cili u zgjodh në Senedd në maj, deklaroi se nuk dëshironte që kjo çështje të shndërrohej në “një shpërqendrim” nga aktiviteti i grupit parlamentar të Reform UK në Uells.
“Gjatë fundjavës, u raportova në polici dhe u lirova pa akuzë. Theksoj se nuk kam bërë asgjë të gabuar”, u shpreh Thomas. Ai shtoi se vëmendja duhet të mbetet te puna politike e partisë.
Sipas konfirmimit të Policisë së Gwent, të dielën, më 13 shtator, u arrestua një 45-vjeçar nga zona e Aberbargoed. Ai dyshohet për sulm dhe për përfshirje në sjellje kontrolluese ose shtrënguese, ndërsa më pas u la i lirë me kusht në pritje të hetimeve të mëtejshme.
Largimi i Thomas konsiderohet një goditje e rëndësishme për Reform UK, parti që kishte angazhuar burime të konsiderueshme politike në Uells për të sfiduar epërsinë tradicionale të Partisë Laburiste.
Nigel Farage e kishte caktuar Thomasin në krye të Reform UK në Uells në shkurt. Në zgjedhjet e zhvilluara në maj, partia siguroi 34 vende në Senedd dhe u rendit e dyta, pas Plaid Cymru, e cila mori 43 vende.
Megjithëse objektivi ishte që Reform UK të bëhej forca kryesore politike në Uells, rezultati shënoi një rritje të madhe në raport me zgjedhjet e vitit 2021. Mbështetja elektorale e partisë u rrit nga rreth 1% në 2021 në 29% në vitin 2026.
Thomas mungoi të martën në seancën e parë plenare të Senedd-it. Fillimisht, partia e justifikoi mospraninë e tij me “arsye personale”.
Para rikthimit në Uells, vendin e tij të lindjes, Thomas kishte drejtuar këshillin e Barnetit në veri të Londrës. Ai u kthye pasi dha dorëheqjen nga posti i këshilltarit në dhjetor.
Brenda partisë, disa e kishin interpretuar përzgjedhjen e tij si drejtues në Uells si një lëvizje për t’u distancuar nga ish-kreu uellsian i Reform UK, Nathan Gill. Ky i fundit u burgos për korrupsion, pasi pranoi se kishte marrë ryshfet në këmbim të deklaratave pro-ruse në Parlamentin Evropian.
