Gjatë Samitit të Koalicionit të Vullnetmirëve që po mbahet në Paris, ku Shqipëria përfaqësohet nga kryeministri Edi Rama, u mor vendimi për të ngritur një program të përbashkët evropian anti-balistik.
Të lidhura
None found
Kjo nismë synon të krijojë një mekanizëm mbrojtës për Evropën kundër raketave balistike, duke u mbështetur tek eksperienca e fituar nga Kievi në konfliktin me Rusinë, i cili ka tejkaluar tashmë katër vjet.
Presidenti francez Emmanuel Macron ftoi liderët evropianë, përfshirë kryeministrin shqiptar Edi Rama, të cilët u takuan në kryeqytetin francez. Macron e mirëpriti Ramën me një përqafim të ngrohtë, ashtu si edhe krerët e tjerë të shteteve. Në këtë takim mbërriti të hënën edhe presidenti ukrainas Volodymyr Zelenskyy, i cili kërkoi përshpejtimin e bashkëpunimit me vendet evropiane për të forcuar mbrojtjen ajrore të Ukrainës përpara sezonit të dimrit. Gjatë kësaj periudhe, Rusia shton sulmet me qëllim që t’i privojë ukrainasit nga energjia elektrike, ngrohja dhe uji.
Ndërkohë, u bë e ditur se Mbretëria e Bashkuar ka nënshkruar pjesëmarrjen në kredinë mbështetëse prej 90 miliardë eurosh që Bashkimi Evropian ka akorduar për Ukrainën. Ky hap shënon bashkëpunimin e parë më të thelluar midis BE-së dhe Britanisë që pas largimit të kësaj të fundit nga blloku në vitin 2020, pas referendumit të Brexit-it.
Në një deklaratë të përbashkët gjatë samitit, udhëheqësit evropianë theksuan: “Qëllimi ynë është të ndërtojmë një aftësi të përbashkët mbrojtëse nga raketat balistike për Evropën”.
Programi anti-balistik do të përfshijë, sipas deklaratës së vendeve pjesëmarrëse, një arkitekturë të integruar mbrojtëse raketash, e cila do të shërbejë për të penguar dhe neutralizuar kërcënimet e ardhshme me raketa.
