Një lidhje e krijuar përmes Tinder ka shkaktuar shqetësim në strukturat e sigurisë së NATO-s, pasi një oficer i lartë i Marinës Spanjolle u përfshi në një marrëdhënie me një grua të lindur në ish-Bashkimin Sovjetik, e cila u dyshua se mund të kishte kontakte me inteligjencën ruse.
Të lidhura
None found
Sipas “Telegraph”, oficeri kishte nisur një lidhje me Janina White, 49 vjeç, shtetase britanike dhe polake. White, e lindur në ish-Bashkimin Sovjetik, është përfolur si e mundshme agjente e Kremlinit, akuzë që ajo e kundërshton kategorikisht.
“E di me siguri që nuk jam spiune ruse. Të paktën herën e fundit që kontrollova, nuk isha”, tha ajo për gazetën britanike, duke deklaruar se është paragjykuar dhe trajtuar padrejtësisht për shkak të vendlindjes së saj.
Çështja u konsiderua veçanërisht sensitive për shkak të funksionit që mbante oficeri. Ai ishte pjesë e Komandës Detare Aleate të NATO-s, MARCOM, e vendosur në Northwood, Hertfordshire, një qendër e rëndësishme e Aleancës për operacionet detare dhe shkëmbimin e të dhënave të inteligjencës.
Mes përgjegjësive të tij ishte ndjekja e nëndetëseve dhe anijeve luftarake ruse, si edhe e cisternave që lidhen me “flotën në hije” të Rusisë, e përdorur për shmangien e sanksioneve perëndimore.
Marrëdhënia mes oficerit dhe White nisi në tetor 2024, pas njohjes së tyre në Tinder. Më 12 dhjetor, vetëm dy muaj më vonë, oficeri e ftoi atë në një aktivitet shoqëror në bazën e Northwood.
Dokumentet gjyqësore të cituara nga “Telegraph” tregojnë se White u pajis me një leje njëditore për të hyrë si vizitore e shoqëruar. Megjithatë, dyshimet lidhur me të shkaktuan reagim të menjëhershëm nga autoritetet e sigurisë.
Oficerit iu hoq e drejta e hyrjes në bazë dhe ai nuk u lejua të rikthehej në ambientet e Northwood gjatë zhvillimit të hetimit. Paralelisht, nisën dy procese të ndara verifikimi, njëri nga NATO dhe tjetri nga autoritetet spanjolle.
Një dokument gjyqësor i cituar nga gazeta britanike bën të ditur se si pasojë e këtyre procedurave Spanja pezulloi autorizimin kombëtar të sigurisë së oficerit. Në të njëjtin dokument thuhet se autoritetet britanike nuk morën pjesë në hetimin konkret.
Më pas, oficeri u largua nga Northwood dhe në vitin 2025 u kthye në Spanjë.
White, e cila banon në Romford, në lindje të Londrës, vijon të mohojë çdo lidhje me shërbimet ruse. Sipas saj, dyshimet janë ngritur kryesisht për shkak se ajo ka lindur në Bashkimin Sovjetik.
“E dija që ata po merreshin me flotën dhe nëndetëset ruse në hije. Por kishte një ndalim të plotë për të diskutuar çdo detaj në vend”, u shpreh ajo, duke folur për punën e partnerit të saj.
White ka konfirmuar gjithashtu se marrëdhënia me oficerin spanjoll tashmë ka përfunduar.
Ngjarja ka rikthyer në vëmendje kontrollet e forta të sigurisë në Northwood, ku funksionojnë struktura të rëndësishme britanike dhe të NATO-s. Ajo që nisi si një përputhje në Tinder përfundoi me një hetim ndërkombëtar sigurie dhe me heqjen e aksesit të oficerit në një prej objekteve më të ndjeshme ushtarake të NATO-s në Evropë.
