Benjamin Netanyahu përshëndeti masat më të fundit ekonomike të Shteteve të Bashkuara kundër Iranit. Kryeministri izraelit tha se goditja e vendeve dhe kompanive që bashkëpunojnë me regjimin iranian shton presionin mbi Teheranin.
Të lidhura
None found
Duke folur në Këshillin Rajonal Binyamin, në Bregun Perëndimor, Netanyahu e cilësoi vendimin si një zhvillim të rëndësishëm. Ai theksoi se administrata e Donald Trump nuk veproi këtë herë drejtpërdrejt ndaj Iranit, por zgjodhi të ndëshkonte ekonomikisht palët që e mbështesin. “Ajo që bëri Presidenti Trump ishte shtrëngimi i rrethimit ndaj Iranit”, deklaroi ai.
Sipas Netanyahut, gjatë vizitës së tij të fundit në Uashington ai i paraqiti Trumpit tri alternativa për trajtimin e çështjes iraniane: arritjen e një marrëveshjeje, nisjen e një fushate tjetër ushtarake ose forcimin e trysnisë ekonomike.
Kryeministri izraelit u shpreh se presidenti amerikan zgjodhi opsionin e presionit ekonomik, ndërsa masat e fundit konfirmojnë sërish këtë qëndrim.
Në të njëjtën kohë, Sekretari amerikan i Thesarit, Scott Bessent, paralajmëroi vendosjen e sanksioneve të reja ndaj shteteve që nuk pranojnë të ndërpresin marrëdhëniet ekonomike me Iranin.
Netanyahu theksoi se “sfida e Iranit nuk ka mbaruar ende”, duke shtuar se mbetet i vendosur të garantojë që Teherani të mos kthehet në kërcënim për Izraelin.
