Një incident i rëndë është raportuar në Torino të Italisë, ku një djalë 5-vjeçar u godit nga një automjet mbrëmjen e 26 shtatorit. Nëna e fëmijës pretendon se drejtuesja e makinës u përpoq ta përplaste atë dy herë.
Të lidhura
None found
Sipas dëshmisë së gruas, ngjarja ndodhi gjatë një konflikti me motive sentimentale. Ajo ishte bashkë me djalin dhe partnerin e saj kur në vendngjarje mbërriti makina e drejtuar nga 24-vjeçarja Camilla D’Alessandra, ndaj së cilës rëndon akuza për tentativë vrasjeje.
“Ajo u përpoq ta përplaste djalin tim dy herë”, ka deklaruar nëna, duke përshkruar se e gjithë skena u zhvillua brenda pak sekondash.
Gruaja tregon se partneri i saj i kërkoi të shkonte drejt trotuarit, ndërsa ai vetë do të përballej me drejtuesen e automjetit. Megjithatë, kur makina u afrua, ajo thotë se mbeti e pasigurt nëse duhej të qëndronte në vend apo të largohej me vrap.
Fillimisht, automjeti goditi fëmijën, ndërsa më pas, sipas versionit të nënës, u kthye mbrapsht dhe avancoi përsëri, duke e përplasur edhe atë së bashku me partnerin e saj. Pas përplasjes, drejtuesja u largua nga vendi i ngjarjes.
Avokati i Camilla D’Alessandras, Cristian Scaramuzzino, ka paraqitur një tjetër version të situatës. Ai thotë se klientja e tij është thellësisht e tronditur, ka qarë dhe është interesuar për gjendjen shëndetësore të fëmijës.
Mbrojtja këmbëngul se përplasja nuk ishte e qëllimshme dhe mohon që 24-vjeçarja të ketë pasur si synim goditjen e fëmijës.
Hetimi dhe procesi gjyqësor pritet të përcaktojnë se si ndodhi saktësisht ngjarja dhe nëse bëhej fjalë për një veprim të qëllimshëm apo për një aksident.
