Një vatër e re e ethes afrikane të derrave është konfirmuar nga autoritetet serbe në një fermë të madhe në rajonin e Vojvodinës, ndërsa ka nisur edhe procesi për eliminimin e afro 11 mijë derrave me synim ndalimin e përhapjes së virusit.
Për televizionin publik RTS, ministri serb i Bujqësisë, Menaxhimit të Ujërave dhe Pylltarisë, Dragan Glamoçiç, bëri të ditur se prania e virusit është vërtetuar në një fermë në fshatin Hrtkovci.
Të lidhura
None found
Ai sqaroi se nga sot ka filluar skartimi i planifikuar i pothuajse 11 mijë derrave, në kuadër të masave të marra për vënien nën kontroll të shpërthimit të sëmundjes.
Rreth një muaj më parë, në Vojvodinë u identifikuan rastet e para të ethes afrikane të derrave në ferma të vogla familjare. Ky rajon ka numrin më të madh të derrave në Serbi.
Murtaja afrikane e derrave është një sëmundje virale tepër ngjitëse dhe fatale për derrat, megjithatë ajo nuk transmetohet te njerëzit.
Të dhënat tregojnë se kjo sëmundje është zbuluar në 70 vende të botës, mes tyre edhe në 16 shtete evropiane.
Në rajon, raste të ethes afrikane të derrave janë raportuar edhe në Bosnjë dhe Hercegovinë, Hungari dhe Rumani.
