Tymi i prodhuar nga më shumë se 800 zjarre pyjore që vijojnë të jenë aktive në Kanada ka ulur ndjeshëm cilësinë e ajrit në zona të gjera të Kanadasë dhe Shteteve të Bashkuara.
Të lidhura
None found
Autoritetet në SHBA kanë nxjerrë paralajmërime për ndotjen atmosferike në disa shtete, duke këshilluar banorët që të qëndrojnë në mjedise të mbyllura.
Të dhënat e Sistemit Kanadez të Informacionit për Zjarret në Natyrë tregojnë se janë aktive 858 vatra zjarri. Mes tyre janë edhe 30 zjarre të reja, të raportuara gjatë së enjtes, ndërsa pjesa më e madhe mbeten ende jashtë kontrollit.
Shërbimi Kombëtar i Motit i SHBA-së (NOAA) bëri të ditur se paralajmërimet për cilësinë e ajrit shtrihen në Midwest-in e Sipërm, zonën e Liqeneve të Mëdha dhe verilindjen e vendit.
Indeksi i Cilësisë së Ajrit e ka cilësuar ndotjen “të rrezikshme” në disa zona të Miçiganit dhe Minesotës. Ndërkohë, në perëndim të shtetit të Nju Jorkut ajri vlerësohet “shumë i pashëndetshëm”, ndërsa në zonën metropolitane të qytetit të Nju Jorkut niveli është klasifikuar si “i pashëndetshëm”.
Zjarret e mëdha në veriperëndim të Ontarios kanë krijuar masa të trasha tymi, të cilat kanë mbuluar qytete si Thunder Bay dhe Toronto. Rrymat ajrore e kanë çuar tymin mbi Liqenet e Mëdha deri në Nju Jork, duke shkaktuar mjegull të dendur dhe duke kufizuar dukshmërinë.
Në qytetin e Nju Jorkut, autoritetet kanë zgjeruar masat e emergjencës për shkak të valës së të nxehtit dhe ndotjes së ajrit. Për qytetarët janë vënë në dispozicion qindra qendra ftohjeje, ndërsa janë shpërndarë edhe maska mbrojtëse KN95 për të ulur ekspozimin ndaj grimcave të tymit.
Meteorologët presin reshje dhe stuhi në Ontario në ditët e ardhshme, por vlerësohet se ato nuk do të mjaftojnë për të ndikuar në mënyrë të ndjeshme në shuarjen e zjarreve.
Gjatë fundjavës, erërat nga veriperëndimi pritet të vazhdojnë ta çojnë tymin drejt shteteve veriore të SHBA-së. Kjo ka shtuar shqetësimet edhe për ajrin në New Jersey, ku do të luhet finalja e Kupës së Botës. Një ndryshim i drejtimit të erës në fillim të javës së ardhshme pritet të sjellë përmirësim gradual të situatës në jug të kufirit.
Sipas kompanisë zvicerane IQAir, Detroiti ka aktualisht cilësinë më të keqe të ajrit në botë. Pas tij renditen Minneapolis, Chicago dhe Toronto.
