Periferia perëndimore e Romës është tronditur nga një krim i rëndë, pasi në një apartament në zonën Casalotti janë gjetur të pajetë me plagë thike një burrë, bashkëshortja e tij dhe vajza e tyre 8-vjeçare.
Nga sulmi ka mbetur i plagosur djali 20-vjeçar i familjes, i cili ka arritur të mbijetojë dhe po kurohet në spital. Ndërkohë, policia ka shpallur në kërkim një mik të tij, i konsideruar si i dyshuari kryesor.
Të lidhura
None found
Viktimat janë pjesë e një familjeje me origjinë nga Bangladeshi: Kamal Udiu, 39 vjeç, Arzu Udiu, 38 vjeç, si edhe vajza e tyre e vogël. Sipas autoriteteve italiane, krimi ndodhi mbrëmjen e së premtes në një banesë në Via Montiglio, pasi fqinjët dëgjuan britma rreth orës 22:00 dhe panë një person që largohej me vrap nga vendi i ngjarjes.
Menjëherë pas ngjarjes, policia italiane vuri në lëvizje një operacion të gjerë kërkimi. Në kontrollet në zonat përreth dhe në pyllëzimet pranë Casalotti-t po përdoren edhe dronë të pajisur me kamera infra të kuqe. Hetuesit dyshojnë se autori mund të ketë qenë një person i njohur për familjen dhe se viktimat mund ta kenë futur vetë në apartament.
Djali që mbeti gjallë, dhe që po trajtohet në Poliklinikën Gemelli në Romë, është pyetur nga autoritetet. Nga verifikimet e para rezulton se një konflikt i papritur brenda banesës mund të jetë përshkallëzuar në një sulm vdekjeprurës, ndërsa prindërit dyshohet se u përpoqën të mbronin vajzën e tyre.
Banorë të zonës kanë treguar se panë një person të largohej me nxitim nga ndërtesa, i veshur me një bluzë blu. Ndërkohë, hetuesit po shqyrtojnë pamjet e kamerave të sigurisë dhe telefonat celularë të familjes, në përpjekje për të rindërtuar kontaktet e tyre të fundit.
Në vendin e ngjarjes mbërritën edhe ekipet e emergjencës, por mjekët konstatuan në vend vdekjen e çiftit dhe të vajzës. Policia izoloi zonën, ndërsa grupet hetimore morën në pyetje banorë dhe persona të afërt me familjen.
Autoritetet italiane po verifikojnë çdo pistë të mundshme, ndërsa motivi i krimit ende nuk është sqaruar. Sipas hetuesve, ekziston mundësia që i dyshuari të jetë larguar nga Roma, megjithatë kërkimet vijojnë në të gjithë rajonin.
