Mbretëresha Letizia ishte në qendër të vëmendjes gjatë darkës shtetërore të organizuar në Madrid, ku ajo dhe Mbreti Felipe VI pritën Presidentin francez Emmanuel Macron dhe bashkëshorten e tij, Brigitte Macron.
Të lidhura
None found
Për mbrëmjen, mbretëresha 54-vjeçare veshi një fustan të gjatë blu të firmosur nga Carolina Herrera. Ajo e shoqëroi veshjen me “Spanish Floral Tiara”, një prej bizhuterive të saj të preferuara dhe një kurorë me rëndësi historike, që qeveria spanjolle ia dhuroi ish-mbretëreshës Sofia në martesën e saj në vitin 1962.
Fustani u kombinua me sandale metalike me platformë nga marka spanjolle Martinelli. Ndërkohë, Mbreti Felipe VI priti çiftin presidencial francez në Pallatin Mbretëror të Madridit, i veshur me kostum të zi dhe papion të bardhë.
Brigitte Macron u paraqit me një fustan të bardhë elegant, me prerje kolonë dhe zbukurime argjendi në pjesët anësore. Ajo e përfundoi pamjen me një çantë të bardhë me shkëlqim dhe vathë të gjatë.
Emmanuel Macron mbante në veshje edhe dekoratat që përfaqësojnë lidhjet mes Francës dhe Spanjës, mes të cilave ishin shenjat e Urdhrit të Isabellës Katolike.
Menuja e darkës u përgatit posaçërisht nga shefi i njohur spanjoll Joan Roca. Gjatë ceremonisë mbajtën fjalime Presidenti Macron dhe Mbreti Felipe VI.
Në fjalën e tij, Macron iu referua edhe Princeshës Leonor, vajzës së çiftit mbretëror, e cila së fundmi ka nisur studimet universitare në Madrid.
Kjo vizitë përbën vizitën e parë shtetërore të një presidenti francez në Spanjë që prej vitit 2009. Qëllimi i udhëtimit dyditor është thellimi i bashkëpunimit politik, ekonomik dhe diplomatik mes dy vendeve.
Gjatë ditës, Emmanuel Macron dhe Felipe VI diskutuan për marrëdhëniet franko-spanjolle. Në bisedime u përfshi edhe Traktati i Miqësisë dhe Bashkëpunimit, i firmosur nga Macron dhe kryeministri spanjoll Pedro Sánchez në Barcelonë në janar 2023.
