John Bolton, ish-këshilltar i sigurisë kombëtare në SHBA, është shpallur fajtor për posedim të paligjshëm të informacionit të klasifikuar, i lidhur me shënime personale që ai kishte përdorur për përgatitjen e një libri. Për këtë çështje, ai rrezikon deri në pesë vjet burg dhe një gjobë prej 2.25 milionë dollarësh.
Në gjykatë, Bolton pranoi një akuzë të vetme, megjithëse në fillim ishte vënë përballë 18 akuzave që lidheshin me trajtimin e parregullt të materialeve të klasifikuara. Mes dokumenteve në fjalë kishte edhe shënime ditari që përmbanin informacione të mbrojtjes kombëtare, ku disa ishin të kategorizuara si tepër sekrete.
Të lidhura
None found
Sipas marrëveshjes së arritur me prokurorinë, ai ka marrë përgjegjësinë për veprimet e kryera dhe do të marrë dënimin më 28 tetor. Krahas gjobës, Bolton do të kryejë edhe 100 orë shërbim komunitar, si edhe do t’u raportojë autoriteteve të sigurisë kombëtare për materialet që kishte mbajtur në mënyrë të jashtëligjshme.
Gjatë seancës gjyqësore, ai pohoi se akuzat ndaj tij ishin të vërteta dhe shfaqi pendesë për atë që kishte bërë. “Unë e bëra,” deklaroi Bolton në sallën e gjyqit.
Prokurorët theksuan se Bolton i njihte plotësisht rregullat për trajtimin e informacionit të klasifikuar dhe se sjellja e tij kishte vënë në rrezik sigurinë kombëtare. Sipas Prokurores amerikane Kelly Hayes, ai kishte shpërndarë dhe ruajtur në mënyrë të papërshtatshme të dhëna të ndjeshme, duke përfshirë edhe dërgimin e disa shënimeve te familjarët e tij.
Abbe Lowell, avokati i Boltonit, tha se klienti i tij kishte pranuar përgjegjësinë për një gabim dhe se marrëveshja kishte shmangur një proces gjyqësor më të zgjatur, i cili mund të kishte nxjerrë në pah më shumë materiale të ndjeshme. Ai kritikoi gjithashtu mënyrën se si ishin trajtuar raste të ngjashme në administratën e mëparshme amerikane.
Në rrjetet sociale reagoi edhe Presidenti Donald Trump, i cili u shpreh se shpresonte që Bolton “të trajtohej ashpër”. Më herët, ai e kishte cilësuar ish-këshilltarin si një “mashtrues”.
Që prej largimit nga administrata në vitin 2019, Bolton është shfaqur si një kritik i njohur i Trump. Më pas, ai e përshkroi përvojën e tij në librin “Dhoma ku ndodhi”, i cili u bë pjesë e hetimeve lidhur me përdorimin e informacionit të klasifikuar.
