Pas deklaratave të Donald Trump, autoritetet iraniane kanë paralajmëruar se nuk do të pranojnë asnjë lloj ndërhyrjeje nga Shtetet e Bashkuara në rajonin e Ngushticës së Hormuzit.
Të lidhura
None found
Në një thirrje drejtuar kombeve fqinje, Komanda e Forcave të Armatosura të Iranit kërkoi që ato të mos angazhohen në asnjë formë mbështetjeje për misionet ushtarake të Uashingtonit, duke theksuar se kjo do të interpretohej si një sulm i drejtpërdrejtë ndaj integritetit territorial iranian.
Ebrahim Zolfaghari, zëdhënës i selisë qendrore “Khatam al-Anbiya”, deklaroi prerazi: “Ne nuk lejojmë dhe nuk do të lejojmë që Shtetet e Bashkuara të ndërhyjnë në menaxhimin e Ngushticës së Hormuzit”.
Ai shtoi se forcat e armatosura iraniane janë të gatshme të përgjigjen me forcë maksimale ndaj çdo veprimi që rrezikon stabilitetin në këtë pikë kyçe detare.
Zolfaghari vuri në dukje gjithashtu se çdo shtet i rajonit që ofron ndihmë logjistike apo bashkëpunon në çfarëdo mënyre me ushtrinë amerikane, do të cilësohet si palë armiqësore ndaj sovranitetit dhe sigurisë kombëtare të Iranit. “Çdo bashkëpunim me SHBA-në dhe mbështetje logjistike për ushtrinë e atij vendi do të konsiderohet një luftë kundër sovranitetit dhe sigurisë kombëtare të Iranit”, u shpreh ai, duke paralajmëruar se një përshkallëzim i mundshëm do të përfshinte të gjithë rajonin.
Ky qëndrim i ashpër i Teheranit erdhi menjëherë pas komenteve të presidentit amerikan, i cili në një intervistë për Fox News pohoi se SHBA-ja synon të marrë nën kontroll Ngushticën e Hormuzit. Trump argumentoi se vendi i tij meriton të shpërblehet për rolin që luan në garantimin e sigurisë në këtë kalim të rëndësishëm ujor. “Ne do ta mbajmë ngushticën dhe ndoshta do ta menaxhojmë atë. Do të jemi rojet e ngushticës dhe duhet të kompensohemi për këtë”, kishte deklaruar ai.
