Gjermania mund të përballet me rrezikun e përfshirjes në një “konflikt të dhunshëm” me Rusinë, paralajmëroi kreu i Shërbimit Federal të Inteligjencës gjermane, Martin Jaeger. Deklarata u bë gjatë një seance publike të Komisionit Parlamentar për Kontrollin e Shërbimeve Sekrete në Bundestag.
Të lidhura
None found
Jaeger tha se përplasja me Moskën ka hyrë në një fazë të re dhe më të rrezikshme. Si një prej shembujve të kërcënimeve ndaj Gjermanisë, ai përmendi edhe tentativën për atentat në Lajpcig.
Sipas drejtuesit të inteligjencës së jashtme gjermane, Rusia përbën aktualisht kërcënimin më të drejtpërdrejtë, më të gjerë dhe më konkret për vendin.
Ai shtoi se shërbimet sekrete ruse po operojnë “me profesionalizëm të madh dhe pa skrupuj”. Për këtë arsye, rreziku që objektiva në territorin gjerman të goditen mbetet real dhe i menjëhershëm.
Në të njëjtën kohë, mediat e huaja raportojnë se Estonia ka nisur zhvendosjen e një prej brigadave kryesore të ushtrisë drejt Jõhvi-t, rreth 50 kilometra larg kufirit me Rusinë. Lëvizja sinjalizon përgatitjen e vendit baltik për një skenar të mundshëm agresioni nga Moska.
Estonia ka miratuar strategjinë e “mbrojtjes aktive”, e cila synon frenimin e një sulmi që në fazat e para. Përveç shtimit të pranisë ushtarake pranë kufirit, vendi po ndërton një bazë të re në Narvë dhe po zgjeron ndjeshëm aftësitë e goditjes në distanca të largëta, me sisteme si HIMARS dhe Chunmoo.
