Një koleksion i rrallë arkeologjik i periudhës së Bronzit është marrë gjatë orëve të para të së enjtes nga muzeu i Villenës, në provincën e Alikantes, Spanjë.
Të lidhura
None found
Objektivi i grabitjes ishte Thesari i Villenës (Tesoro de Villena), një pasuri rreth 3 mijë vjeçare e përbërë kryesisht nga sende të çmuara prej ari, argjendi, hekuri dhe qelibari.
Alarmi i muzeut u sinjalizua në orën 05:16, ndërsa ende nuk është përcaktuar nëse autorët kanë marrë të gjithë koleksionin apo vetëm një pjesë të tij. Përmasat e sakta të vjedhjes mbeten gjithashtu për t’u verifikuar.
Pas ngjarjes, në muze kanë mbërritur Guardia Civil dhe Policia Gjyqësore. Sipas burimeve komunale të cituara nga agjencia spanjolle EFE, strukturat hetimore po punojnë për të sqaruar mënyrën e grabitjes dhe për të identifikuar objektet e zhdukura.
I datuar rreth vitit 1000 p.e.s., Thesari i Villenës vlerësohet si një nga koleksionet më të rëndësishme metalurgjike të Epokës së Bronzit në Evropë.
Koleksioni përfshin 59 objekte, me një peshë të përgjithshme prej gati 10 kilogramësh. Në të bëjnë pjesë 11 gota, 28 byzylykë dhe tre vazo, si edhe sende të punuara në argjend, qelibar, hekur dhe ar.
Rëndësia e thesarit shkon përtej vlerës së lëndëve të çmuara që përmban, pasi ai mbart një peshë të jashtëzakonshme historike dhe arkeologjike. Për këtë arsye, koleksioni konsiderohet i paçmueshëm për trashëgiminë kulturore evropiane.
Zbulimi i tij, në vitin 1963, lidhet me një ngjarje që duket si e shkëputur nga një film.
Në tetor të atij viti, në dheun e sjellë nga Rambla del Panadero, në Sierra del Morón de Villena, punëtorët gjetën një byzylyk. Në fillim, ata menduan se objekti ishte pjesë e një motori kamioni.
Ángel Tomás, shefi i projektit, e vendosi byzylykun në një vend ku mund të shihej, duke menduar se pronari do të kthehej për ta marrë. Edhe ai besonte se bëhej fjalë për një kushinetë kamioni.
Gjetja përfundoi më pas te argjendari vendas Carlos Miguel Escobre, i cili dyshoi se objekti mund të kishte rëndësi shumë më të madhe. Ai njoftoi José María Soler, që në atë kohë drejtonte Muzeun Arkeologjik Bashkiak.
Pas shqyrtimit të byzylykut, nisën kërkimet arkeologjike në Rambla del Panadero. Më 1 dhjetor 1963, pas disa ditësh gërmime, Soler dhe kolegët e tij zbuluan thesarin brenda një vazoje të fshehur në shtratin e përroit.
Zbulimi u shndërrua në një nga gjetjet më të rëndësishme të Epokës së Bronzit në Evropë. Më shumë se gjashtë dekada më vonë, thesari ndodhet sërish në qendër të vëmendjes, këtë herë për shkak të hetimit policor që synon të zbardhë grabitjen dhe të përcaktojë se cilat objekte janë marrë nga muzeu.
