Gjykata e Lartë në Londër ka hedhur poshtë padinë me vlerë 50 milionë paund të paraqitur nga Princi Harry, Doreen Lawrence dhe disa emra të njohur publikë, mes tyre Elton John dhe Elizabeth Hurley, ndaj botuesit të Daily Mail dhe Mail on Sunday.
Të lidhura
None found
Çështja u shqyrtua për tre muaj, ndërsa në fund gjyqtari Nicklin rrëzoi të gjitha 97 pretendimet e ngritura në këtë proces.
Paditësit kishin pretenduar se Associated Newspapers kishte siguruar informacion në mënyrë të paligjshme, duke përfshirë përgjimin e telefonave dhe cenimin e privatësisë. Megjithatë, gjykata pranoi mohimet e paraqitura për çdo formë të paligjshme të mbledhjes së të dhënave, si edhe dëshmitë e gazetarëve të kompanisë.
Në vendim thuhet se gazetarët e Associated Newspapers ofruan shpjegime të besueshme për mënyrën se si ishin marrë informacionet e publikuara.
Pas shpalljes së vendimit, një zëdhënës i Associated Newspapers e përshkroi atë si “një fitore dërrmuese për Daily Mail, gazetarët e saj dhe lirinë e shtypit”. Ai theksoi gjithashtu se akuzat më të rënda, si vendosja e pajisjeve të përgjimit, monitorimi i telefonatave dhe hyrja në llogari bankare, nuk u mbështetën me prova të besueshme.
Princi Harry kishte udhëtuar nga Kalifornia drejt Londrës për të dëshmuar në gjykatë. Gjatë dëshmisë së tij, ai foli edhe për ndikimin që, sipas tij, presioni i mediave ka pasur te bashkëshortja e tij, Meghan Markle, duke e quajtur këtë situatë një “mjerim absolut”. Gjyqtari vlerësoi se dëshmia e Harry-t ishte e sinqertë, por theksoi se përmbajtja emocionale e saj nuk ndryshonte faktet mbi të cilat u mbështet vendimi përfundimtar.
