Gjykata e Lartë e SHBA-së refuzoi të hënën përpjekjen e Presidentit Donald Trump për të mos paguar 5.6 milionë dollarët që ishte urdhëruar t’ia jepte ish-shkrimtares së revistës E. Jean Carroll.
Të lidhura
None found
Ky është dështimi më i fundit ligjor i Trump në përballjen e zgjatur gjyqësore me Carroll. Pasi Gjykata e Lartë nuk e pranoi apelin e presidentit në qershor, avokatët e tij kërkuan rishqyrtimin e çështjes, por gjyqtarët hodhën poshtë tashmë edhe këtë kërkesë.
Vendimi u dha pa asnjë kundërshtim të shprehur nga anëtarët e gjykatës.
Në zbatim të një urdhri të një gjykate më të ulët, Trump e ka paguar tashmë shumën prej 5.6 milionë dollarësh. Në një dokument gjyqësor, avokatët e Carroll kishin bërë të ditur se paratë do të qëndronin në një llogari që gjeneron interes deri në përfundimin e kërkesës së Trump për rishqyrtim.
Përplasja ligjore nisi në vitin 2019, kur Carroll e paditi Trumpin për shpifje. Një padi tjetër u ngrit prej saj në vitin 2022, këtë herë me akuza për abuzim seksual dhe shpifje, pasi Nju Jorku miratoi një ligj që u lejonte viktimave të abuzimit seksual të paraqisnin padi civile edhe për ngjarje të ndodhura vite më parë.
Ndonëse u depozitua e dyta, çështja e vitit 2022 doli e para para jurisë. Trump u shpall përgjegjës dhe Carroll iu njohën 5 milionë dollarë dëmshpërblim.
Më vonë u gjykua padia e vitit 2019 për shpifje, e cila solli një vendim shumë më të rëndë kundër Trump, me një dëmshpërblim prej 83 milionë dollarësh. Kjo çështje e veçantë është ende në pritje të shqyrtimit nga Gjykata e Lartë.
Kërkesat për rishqyrtimin e vendimeve pranohen vetëm në raste të rralla nga Gjykata e Lartë.
Një zëdhënës i ekipit juridik të Trump e kundërshtoi vendimin dhe deklaroi se presidenti do ta vijojë betejën ndaj asaj që ai e përshkroi si “gjueti shtrigash” dhe “Lawfare” të financuar nga demokratët.
Sipas pretendimit të Carroll, Trump e sulmoi seksualisht në një dyqan në Nju Jork në mesin e viteve 1990. Ajo tha gjithashtu se ai më pas e shpifi, duke deklaruar se historia ishte sajuar prej saj për të shtuar shitjet e librit.
Trump i ka hedhur vazhdimisht poshtë akuzat. Ai ka pretenduar gjithashtu se gjyqtari federal Lewis Kaplan, i cili drejtoi procesin civil, kreu disa gabime që ndikuan te vendimi i jurisë.
Mes kundërshtimeve të avokatëve të Trump ishte lejimi i dëshmive nga dy gra, të cilat kishin pretenduar se presidenti i kishte sulmuar seksualisht vite më parë. Ata kundërshtuan po ashtu paraqitjen gjatë gjyqit të regjistrimit të njohur “Access Hollywood”, në të cilin Trump dëgjohej teksa bënte komente vulgare për gratë.
Gjykata e Apelit e Qarkut të Dytë la në fuqi vitin e kaluar vendimin prej 5 milionë dollarësh. Ajo arriti në përfundimin se gjyqtari i shkallës së parë nuk kishte kryer gabime që mund të përligjnin zhvillimin e një gjyqi të ri.
Në qershor 2025, Trump dështoi edhe në përpjekjen që çështja të shqyrtohej nga trupi i plotë i gjyqtarëve të Qarkut të Dytë. Më pas ai iu drejtua Gjykatës së Lartë, e cila e hodhi poshtë apelin në qershor të këtij viti.
Me vendimin e fundit, Gjykata e Lartë i dha fund edhe tentativës së Trump për të rihapur këtë pjesë të konfliktit gjyqësor me E. Jean Carroll. Ndërkohë, çështja tjetër, që lidhet me dëmshpërblimin prej 83 milionë dollarësh, vazhdon të jetë në pritje të shqyrtimit.
