Fustani i zi që Princeshë Diana veshi në një gala në Londër, vetëm disa orë pasi princi i atëhershëm Charles pranoi publikisht tradhtinë gjatë martesës së tyre, do të ofrohet për shitje në ankand.
Të lidhura
None found
Veshja, e krijuar posaçërisht nga stilistja Christina Stambolian, u bë një nga elementet më të njohura të imazhit publik të Dianës. Princesha e veshi atë në Galerinë Serpentine në vitin 1994, në një paraqitje që u shndërrua në një prej momenteve më të diskutuara të kulturës pop të asaj kohe.
Për shkak të rrethanave dhe mesazhit që përcolli, mediat e quajtën atë “fustani i hakmarrjes”. Sot, kjo veshje renditet ndër krijimet më ikonike të garderobës së Princeshë Dianës.
Sotheby’s vlerëson se fustani mund të shitet për deri në 300 mijë dollarë, ose rreth 220 mijë paund. Ankandi është planifikuar të zhvillohet më 9 dhjetor.
Kjo është hera e parë që fustani del në ankand që prej vitit 1997. Në atë kohë, Princesha Diana nxori në shitje 79 nga fustanet e saj, me synimin për të mbledhur para për organizata bamirësie, bëri të ditur Sotheby’s.
Morgane Halimi, e cila drejton departamentin global të çantave dhe modës në Sotheby’s, tha se Diana “e kuptonte instinktivisht” fuqinë e modës si një formë komunikimi.
“Me kushtet e saj, Princesha Diana e ktheu fustanin në një prej mesazheve më të fuqishme që ka përcjellë ndonjëherë, në një nga periudhat më të vëzhguara dhe emocionalisht të ngarkuara të jetës së saj”, u shpreh Halimi.
Sipas saj, në një kohë kur rrëfimi për jetën e Dianës po përcaktohej nga persona të tjerë, zgjedhja e kësaj veshjeje i mundësoi princeshës “të rimerrte vetë kontrollin mbi rrëfimin”.
Stilistja personale e Dianës në atë periudhë, Anna Harvey, kishte deklaruar se princesha “donte të dukej si një milion dollarë”, sipas të dhënave të Sotheby’s.
Për darkën bamirëse, Diana ndryshoi në çastet e fundit veshjen që kishte planifikuar të përdorte. Ajo zgjodhi fustanin e zi pa mëngë të stilistes greke Christina Stambolian dhe e plotësoi pamjen me një çantë të zezë, këpucë të zeza dhe një bizhuteri mbretërore.
Jaguar XJ40 me të cilin princesha shkoi në aktivitet u shit gjithashtu në ankand në fillim të këtij viti, për 66,250 paund. Pavarësisht kësaj, fustani pritet të ketë një vlerë shumë më të madhe në treg.
Një tjetër veshje e Princeshë Dianës dëshmoi më herët interesin e madh të koleksionistëve. Në vitin 2023, pulovra e saj me dele, ku një dele e zezë shfaqej mes deleve të bardha, u shit nga Sotheby’s në Nju Jork për 920 mijë paund.
