Suedia voton të dielën në zgjedhjet e përgjithshme, në një përballje shumë të ekuilibruar që mund t’i hapë rrugën ekstremit të djathtë për të marrë pjesë në qeveri për herë të parë. Sipas analistëve, kjo mund të ndodhë nëse blloku i partive të djathta arrin të sigurojë shumicën.
Të lidhura
None found
Sondazhi i publikuar nga Dagens Nyheter/Ipsos nxjerr në pah diferencën minimale mes dy kampeve: aleanca e qendrës së majtë pritet të fitojë 175 mandate, ndërsa blloku i djathtë 174 vende në parlament. Hendeku mes tyre është vetëm 0.3 pikë.
Magdalena Andersson, përfaqësuese e social-demokratëve, konsiderohet favoritja për t’u rikthyer në postin e kryeministres. Megjithatë, epërsia e saj është zvogëluar ndjeshëm gjatë ditëve të fundit.
Në vitin 2022, kryeministri aktual Ulf Kristersson dhe Partia e tij e të Moderuarve thyen një tabu të vjetër duke bashkëpunuar me Demokratët e Suedisë, SD, një forcë e ekstremit të djathtë.
Që prej atëherë, SD ka fituar peshë të konsiderueshme, sidomos në vendimmarrjen për emigracionin dhe kriminalitetin. Kristersson ka premtuar tashmë se, në rast të një fitoreje të re të së djathtës, kësaj partie do t’i ofrohen edhe poste ministrore.
Sipas ekspertëve të të drejtave civile, përfshirja e SD-së në kabinet mund ta dëmtojë më tej imazhin tradicional të Suedisë si një prej vendeve që mbrojnë më fort të drejtat e njeriut.
Ndërkohë, qeveria ka ashpërsuar tashmë qasjen e saj përmes deportimeve të shumta, uljes së moshës së përgjegjësisë penale dhe kufizimeve më të forta në fushën e emigracionit.
Demokratët e Suedisë kërkojnë, mes të tjerash, pakësim të mëtejshëm të imigracionit, heqjen e lejeve të përhershme të qëndrimit dhe masa më të rrepta ndaj personave me origjinë të huaj. Slogani i tyre është: “Ta bëjmë Suedinë sërish Suedi.”
