Dy aksidente gjatë festivaleve tradicionale Danjiri në prefekturën e Osakës lanë të vdekur dy persona dhe të plagosur 16 të tjerë. Sipas gazetës japoneze Asahi Shimbun, karrocat e mëdha prej druri u përmbysën teksa po manovroheshin në rrugët e qyteteve Izumisano dhe Izumiotsu.
Ngjarja e parë ndodhi rreth orës 11:00 me orën lokale, në kryqëzimin Nagataki të qytetit Izumisano. Autoritetet thanë se karroca zuri poshtë disa persona. Ekipet e shpëtimit nxorën nga poshtë saj një 51-vjeçar dhe e dërguan në spital, ku u shpall i vdekur.
Të lidhura
None found
Në spital u transportuan edhe shtatë persona të tjerë, të moshave nga 10 deri në 59 vjeç. Dy prej tyre kishin pësuar lëndime të rënda.
Rreth dy orë pas aksidentit të parë, një karrocë tjetër u përmbys në qytetin Izumiotsu. Shërbimet lokale të emergjencës morën në orën 13:20 një telefonatë për ngjarjen në kryqëzimin Miyamachi. Një punëtor fabrike 48-vjeçar nga qyteti Izumi mbeti i shtypur nën strukturën prej druri dhe humbi jetën. Nëntë persona të tjerë u dërguan në spital me lëndime që, sipas autoriteteve, nuk u rrezikonin jetën.
Të dy viktimat merrnin pjesë në mënyrë aktive në festival dhe kishin rolin e quajtur “takari”. Ata përpiqeshin të mbanin në ekuilibër strukturat e rënda gjatë kthesave, por u shtypën nga karrocat pasi këto humbën ekuilibrin.
Në të dy aksidentet, përmbysja ndodhi gjatë manovrës “yarimawashi”, kur pjesëmarrësit synojnë t’i kthejnë me shpejtësi karrocat shumëtonëshe në kënde të mprehta pa ua ulur vrullin. Policia po heton shkaqet e sakta, ndërsa dyshohet se karrocat humbën ekuilibrin në kthesa të menjëhershme djathtas.
Festivalet Danjiri janë pjesë e një tradite të njohur japoneze, veçanërisht në rajonin e Osakës. Komunitetet lokale mblidhen për të drejtuar nëpër rrugët e qyteteve karroca të mëdha prej druri, të zbukuruara me gdhendje dhe ornamente tradicionale. Ato mund të peshojnë disa tonë, tërhiqen me litarë nga grupe të mëdha njerëzish dhe shoqërohen nga muzika e brohoritjet.
