Autoritetet britanike kanë ngritur akuza ndaj dy burrave iranianë, të dyshuar se po përgatitnin një sulm terrorist kundër komunitetit hebre në Mançester.
Të lidhura
None found
Rahman Salehi, 35 vjeç, dhe Salam Ahmadyan, 36 vjeç, përballen me akuzën për përgatitjen e një akti terrorist ose për ndihmën ndaj një personi tjetër për realizimin e tij. Sipas policisë kundër terrorizmit, ata dyshohet se synonin të përdornin një pajisje shpërthyese të improvizuar.
Hetuesit pretendojnë se të dyshuarit përdorën aplikacione të koduara për të siguruar materiale dhe pjesë të ndryshme që do të shërbenin për ndërtimin e pajisjes.
Policia thotë se Salehi dhe Ahmadyan kishin marrë edhe video me udhëzime për montimin e saj, ndërsa dyshohet se kishin grumbulluar lëngje, përbërës dhe pajisje të tjera të nevojshme.
Sipas akuzave, ata kishin kërkuar në internet informacione për objektiva të mundshëm, kishin mbledhur fotografi, plane dhe harta, si dhe kishin kryer veprime zbulimi në terren.
Arrestimi i tyre u krye më 20 shtator, në prag të Yom Kippur, që konsiderohet dita më e shenjtë në kalendarin hebraik. Të dy u ndaluan në Newton Street, në Northern Quarter të Mançesterit, dhe më pas u dërguan në paraburgim në një komisariat policie në Londër.
Ndaj tyre u zbatua neni 41 i Aktit të Terrorizmit të vitit 2000, ndërsa policia kundër terrorizmit mori autorizim për zgjatjen e kohës së marrjes në pyetje.
Policia Metropolitane, e cila drejton hetimin, njoftoi se kontrolle janë zhvilluar edhe në disa prona në Epworth Street në Liverpool dhe në Lancaster Road në Salford.
Vicki Evans, koordinatore e lartë kombëtare e policisë kundër terrorizmit, deklaroi se operacioni i përbashkët me shërbimet e sigurisë kishte penguar atë që autoritetet e konsiderojnë si një komplot të drejtuar ndaj komunitetit hebre në Mançester.
Evans paralajmëroi se ekzistojnë edhe kërcënime të tjera më të gjera, të lidhura me Iranin, të cilat dyshohet se po orientohen kundër Mbretërisë së Bashkuar.
Ajo sqaroi se kjo çështje nuk ka lidhje me hetimin që po zhvillohet për incidentin në bazën ajrore RAF Fairford.
Sekretarja e Brendshme britanike, Shabana Mahmood, tha se arrestimet tregojnë se kërcënimi nga terroristët dhe aktorët e huaj shtetërorë mbetet i pranishëm.
Sipas saj, zhvillimi është veçanërisht shqetësues për komunitetet hebraike, pasi ndalimet u kryen në periudhën pranë Rosh Hashanah dhe Yom Kippur.
