Pas aktgjykimit të Dhomave të Specializuara të Kosovës për katër ish-drejtuesit e Ushtrisë Çlirimtare të Kosovës, Mbretëria e Bashkuar ka riafirmuar përkrahjen e saj ndaj Kosovës.
Ministri britanik për Evropën, Stewart Wood, deklaroi se Londra e respekton pavarësinë e Dhomave të Specializuara dhe procesin gjyqësor të zhvilluar prej tyre. Ai nënvizoi se Britania vazhdon të jetë e angazhuar për drejtësi, llogaridhënie dhe pajtim në rajon.
Të lidhura
None found
Sipas Wood, Mbretëria e Bashkuar mbetet një mike dhe partnere e ngushtë e Kosovës, duke përkrahur fuqishëm sovranitetin, pavarësinë dhe tërësinë e saj territoriale, si dhe ruajtjen e paqes në Ballkanin Perëndimor.
Ministri britanik kujtoi gjithashtu kontributin e vendit të tij në ndërhyrjen e NATO-s më 1999 dhe mbështetjen e dhënë për pavarësinë e Kosovës në vitin 2008.
Ai u shpreh se Britania është krenare për rolin që luajti përkrah aleatëve të NATO-s në përpjekjet për të parandaluar një katastrofë humanitare gjatë vitit 1999, si edhe për përkrahjen e pavarësisë së Kosovës më 2008.
Wood e përshkroi aktgjykimin si një moment me rëndësi, por sqaroi se ai ka të bëjë vetëm me individë dhe nuk përfaqëson një vlerësim ndaj shtetësisë, sovranitetit apo së drejtës së Kosovës për të vendosur për të ardhmen e vet.
Në reagimin e tij, ai u kërkoi drejtuesve politikë dhe personaliteteve publike të nxisin qetësinë dhe të kujdesen që përgjigjet ndaj vendimit të mbeten paqësore.
Ministri theksoi se përfundimet e Gjykatës lidhen me persona të caktuar dhe nuk duhet të shfrytëzohen për të ushqyer tensione mes komuniteteve ose në të gjithë rajonin.
Wood bëri të ditur se Mbretëria e Bashkuar do të vijojë bashkëpunimin me partnerët rajonalë, me synimin për të mbështetur paqen, drejtësinë dhe një të ardhme të sigurt e të begatë për të gjitha komunitetet.
