Një kuzhinier 51-vjeçar humbi jetën në një aksident tragjik në SHBA, pasi automjeti i tij, ku ai ishte duke fjetur, u godit nga një SUV.
Përplasja ndodhi rreth orës 07:00 të mëngjesit të së shtunës, pranë Carbon Canyon Road, në zonën e Los Anxhelosit.
Të lidhura
None found
Sipas pamjeve të ngjarjes, SUV-i po udhëtonte me shpejtësi kur drejtuesi humbi kontrollin. Automjeti doli drejt anës së rrugës dhe u përplas me makinën e parkuar, brenda së cilës ndodhej Ryo Uchimiya.
Fuqia e goditjes e shtyu makinën e 51-vjeçarit drejt një automjeti tjetër. Pas përplasjes me të, ky automjet u përplas edhe me një makinë të tretë.
Ryo Uchimiya u gjet i pajetë në sediljen e pasme të makinës së tij. Raportohet se ai kishte shkuar herët në atë zonë për të punuar në një aktivitet catering dhe po pushonte në automjet derisa të niste puna.
Viktima kishte përvojë si kuzhinier dhe për disa vite kishte punuar në restorantin e njohur Nobu Malibu. Kolegët kanë thënë se ai kishte qenë në punë edhe gjatë natës para aksidentit.
SUV-i drejtohej nga një 16-vjeçar, i cili po lëvizte në drejtim të lindjes në Pacific Coast Highway. Të dhënat paraprake sugjerojnë se ai mund të ketë tejkaluar kufirin e lejuar të shpejtësisë, pasi automjeti besohet se po udhëtonte me rreth 50 milje në orë, ose afërsisht 80 kilometra në orë.
Autoritetet po hetojnë për të përcaktuar saktësisht se si ndodhi aksidenti. Një nga pistat që po shqyrtohet është mundësia që SUV-i të ketë kaluar vijën e bardhë anësore të rrugës përpara se të godiste makinën e parkuar të viktimës.
