Kryetari i Partisë Demokratike, Sali Berisha, doli në një konferencë për shtyp para gazetarëve.
Në deklaratën e tij, Berisha tha se Edi Rama e konsideron Shqipërinë si një sulltanat personal, si pronë private të tij, ndërsa regjimin e drejtuar prej tij e cilësoi si një regjim kolonial ndaj shqiptarëve.
Të lidhura
None found
Ai u shpreh se mediat kanë nxjerrë në dritë librin famëkeq “Dosja”, ku sipas tij Edi Rama ka parashikuar dhe projektuar 523 resorte, hotele dhe zhvillime në zonat turistike.
Sipas Berishës, sikur të bëhej fjalë për pronën e vet, Rama përjashton nga taksat për 10 vite gjithë këtë infrastrukturë gjigante.
Berisha ngriti pyetjen nëse mund të ketë një shfrytëzim më të egër se ky, duke shtuar se ky është një sistem tipik kolonial.
Ai deklaroi se kjo nuk ka asgjë të përbashkët as me ligjin themelor të shtetit, Kushtetutën, dhe as me ligjin ndërkombëtar të investimeve.
Më tej, Berisha tha se të mendosh zhvillimin e dhjetëra e dhjetëra milionë metra katrorë troje në zonat më turistike, njësoj si butikët pa taksa në aeroport, do të thotë të vendosësh një sistem nga i cili njerëzimi është shkëputur prej kohësh.
Ai iu drejtua të pranishmëve me pyetjen nëse mund ta imagjinonin një gjë të tillë.
Sipas Berishës, Shqipëria është ndër vendet e pakta në botë ku miliarderët vijnë dhe marrin miliona litra naftë me një të katërtën e çmimit që paguan fermeri shqiptar.
Në vijim, ai tha se në librin e tij, të mbajtur sekret ndaj shqiptarëve dhe të papublikuar ndonjëherë, Edi Rama rendit 523 projekte për zhvillim dhe ndërtim në të katër anët e vendit.
